प्रेस काउन्सिलमा श्रेष्ठ र दूरसञ्चार प्राधिकरणमा घिमिरे

काठमाडौँ । सरकारले प्रेस काउन्सिल नेपालको अध्यक्षमा उमेश श्रेष्ठलाई नियुक्त गरेको छ । त्यस्तै, नेपाल दूरसञ्चार प्राधिकरणको अध्यक्षमा अर्जुन घिमिरे नियुक्त भएका छन् ।

उनीहरू दुवै जनालाई खुला प्रतिस्पर्धाका आधारमा सरकारले नियुक्त गरेको हो । मन्त्रिपरिषद्को असार २४ गतेको निर्णयअनुसार उनीहरूलाई नियुक्त गरिएको सूचना तथा सञ्चार मन्त्रालयले जनाएको छ । सञ्चारमन्त्री डा. विक्रम तिमिल्सिनाले आज दुवै जनालाई नियुक्तिपत्र प्रदान गरे । दूरसञ्चार प्राधिकरणका नवनियुक्त अध्यक्ष घिमिरेले आजै पद तथा गोपनीयताको शपथसमेत लिएका छन् ।

Watch On

सो अवसरमा मन्त्री तिमिल्सिनाले नियामक निकायहरूले आफ्नो भूमिकालाई गम्भीरतापूर्वक निर्वाह गर्नुपर्ने बताए । दुवै संस्थालाई मन्त्रालयले आवश्यक नीतिगत तथा संस्थागत सहयोगका लागि उपयुक्त वातावरण बनाउन सदैव तयार रहेको उल्लेख गर्दै उनले जिम्मेवारीपूर्वक कार्यसम्पादन गर्न पनि आग्रह गरे ।

प्रेस काउन्सिल नेपालका नवनियुक्त अध्यक्ष उमेश श्रेष्ठले सञ्चार माध्यमको स्वरूप परिवर्तन भइसके पनि प्रेस काउन्सिलसम्बन्धी कानुन पुरानो भइसकेको उल्लेख गर्दै त्यसलाई समयानुकूल परिमार्जन गर्नुपर्ने आवश्यकता औँल्याए ।

त्यसैगरी, नेपाल दूरसञ्चार प्राधिकरणका नवनियुक्त अध्यक्ष अर्जुन घिमिरेले दूरसञ्चार क्षेत्रका विद्यमान कमी–कमजोरी हटाउँदै समस्या समाधानमा केन्द्रित भएर काम गर्ने प्रतिबद्धता व्यक्त गरे ।