जनप्रतिनिधिका कुरा

प्रतिनिधिसभा बैठक बस्दै, प्रधानमन्त्रीको तर्फबाट कानुनमन्त्री गौतमले तीन प्रतिवेदन र दुई विधेयक प्रस्तुत गर्ने

सिधाकुरा

मंगलबार, असार ३०, २०८३

प्रतिनिधिसभा बैठक बस्दै, प्रधानमन्त्रीको तर्फबाट कानुनमन्त्री गौतमले तीन प्रतिवेदन र दुई विधेयक प्रस्तुत गर्ने

काठमाडौँ । प्रतिनिधि सभाको बैठक आज बस्दैछ ।

विहान ११ बजे बस्ने बैठकमा प्रधानमन्त्री बालेन्द्र शाहको तर्फबाट कानुन, न्याय तथा संसदीय मामिलामन्त्री सोविता गौतमले तीनवटा प्रतिवेदन पेस र दुईटा विधेयक प्रस्तुत गर्ने कार्यसूची छ ।

Watch On

गौतमले न्याय परिषद, न्याय सेवा आयोगको वार्षिक प्रतिवेदन र लोकसेवा आयोगको ६६औं वार्षिक प्रतिवेदन पेस गर्ने कार्यसूची छ ।

यसैगरी प्रधानमन्त्री शाहको तर्फबाट नेपाल विशेष सेवा ऐन २०४२ को साविकको व्यवस्था जगाउने सम्बन्धी विधेयक र राष्ट्रिय सेवा दल विधेयकलाई दफावार छलफलको लागि सम्बन्धित समितिमा पठाइयोस् भन्ने प्रस्ताव पनि कानुन मन्त्री गौतमले प्रस्तुत गर्ने कार्यसूची छ ।

आजको बैठकमा अर्थमन्त्री डा. स्वर्णिम वाग्लेले अर्थसम्बन्धी केही नेपाल कानुनलाई संशोधन र खारेज गर्ने विधेयक प्रस्तुत गर्ने कार्यसूची पनि छ ।

यसैगरी श्रममन्त्री रामजी यादवले अन्तर्राष्ट्रिय श्रम संगठनको बाध्यकारी श्रम महासन्धी १९३० सम्बन्धी सन् २०१४ को प्रोटोकल नम्बर २९ र अन्तर्राष्ट्रिय श्रम संगठनको श्रम निरीक्षण सम्बन्धी महासन्धी १९४७ (नम्बर ८१) माथि छलफल गरियोस् र दुबै महासन्धीलाई अनुमोदन गरियोस् भन्ने प्रस्ताव प्रस्तुत गर्ने कार्यसूची छ ।

प्रकाशित मिति: मंगलबार, असार ३०, २०८३

प्रतिक्रिया दिनुहोस्