बागमती प्रदेश सरकारमा ६ जना मन्त्री महाशाखा प्रमुखको हैसियतमा, एउटै मन्त्रालयमा ३ जनासम्म मन्त्री

काठमाडौँ । बागमती प्रदेश सरकारमा शुक्रबारबाट ६ जना विना विभागीय मन्त्रीका रुपमा कार्य विभाजन गरिएको छ ।

प्रदेश सरकारले गत बैशाख २२ मा खर्च कटौती गर्न भन्दै १४ मन्त्रालयलाई घटाएर ८ मन्त्रालयमा सीमित गर्ने निर्णय अनुरुप आजबाट मुख्यमन्त्री तथा मन्त्रिपरिषद्को कार्यालयसहित बागमती प्रदेश सरकार ८ मन्त्रालयमार्फत सञ्चालन हुनेछ ।

Watch On

तर तत्कालिन मन्त्रालयमा रहेका ६ मन्त्रीहरु मन्त्रालय नभएपछि विना विभागीयका रुपमा कार्य विभाजन गरेको छ । प्रदेश सरकारले संगठन तथा व्यवस्थापन (ओएन्डएम) सर्वेक्षण सम्पन्न नभएकाले कर्मचारी तथा सचिव व्यवस्थापन तत्कालका लागि पुरानै संरचनाअनुसार सञ्चालन गर्नु परेको बताएको छ ।

प्रदेश प्रमुख दीपकप्रसाद देवकोटाले संविधानको धारा १६८ को उपधारा ९ बमोजिम ८ जना मन्त्रीलाई विभिन्न मन्त्रालय र ६ जनालाई विना विभागीय मन्त्रीका रुपमा कार्य विभाजन गरेका छन् ।

नयाँ कार्य विभाजनअनुसार मुख्यमन्त्री इन्द्रबहादुर बानियाँसँग मुख्यमन्त्री तथा मन्त्रिपरिषद्को कार्यालय रहेको छ भने मधुसूदन पौडेल कृषि, पशुपन्छी, वन तथा वातावरण मन्त्रालय, शिवराज अधिकारी आन्तरिक मामिला, कानुन तथा सहकारी मन्त्रालय, कञ्चनचन्द्र वादे स्वास्थ्य तथा सामाजिक विकास मन्त्रालय, डा.दिनेशचन्द्र देवकोटा भौतिक पूर्वाधार विकास मन्त्रालय, प्रभात तामाङ आर्थिक मामिला तथा योजना मन्त्रालय, कृष्णकुमार तामाङ खानेपानी, ऊर्जा तथा सिँचाइ मन्त्रालय तथा बिन्दु श्रेष्ठ उद्योग, पर्यटन, श्रम तथा यातायात मन्त्रालय रहेका छन् ।

त्यस्तै, किरण थापा मगर, उर्मिला नेपाल, भरतबहादुर केसी, सुरेश श्रेष्ठ, जयराम थापा र बिनु रायमाझी पौडेललाई बिनाविभागीय मन्त्री बनाइएको छ । मन्त्रालय नै खारेज भएपछि उनीहरूलाई मन्त्रालयको महाशाखाको जिम्मेवारी दिईएको छ । मन्त्री पद, सरकारी सुविधा, सुरक्षा, सवारी र झण्डा भने यथावत् कायम रहेको छ ।

महाशाखाको हैसियतमा मन्त्रीहरुः
मन्न्त्रालय विहिन बनेका ६ मन्त्रीहरुलाई कायम रहेका ८ मन्त्रालयका विषयगत (महाशाखा) जिम्मेवारी दिईएको छ ।

मन्त्रालय खारेजीमा परेर बिना विभागीय मन्त्री बनेका जयराम थापालाई श्रम, रोजगार तथा यातायात विषयगत (महाशाखा), मन्त्री सुरेश श्रेष्ठलाई संस्कृति तथा पर्यटन विषयगत (महाशाखा) हेर्ने जिम्मेवारी पाएका छन् ।

त्यस्तै, मन्त्री किरण थापा मगरलाई स्वास्थ्य तथा सामाजिक विकास मन्त्रालयको स्वास्थ्य विषयगत (महाशाखा), मन्त्री उर्मिला नेपाललाई स्वास्थ्य तथा सामाजिक विकास मन्त्रालयको युवा तथा खेलकुद विषयगत (महाशाखा) को जिम्मेवारी दिइएको मुख्यमन्त्रीको सचिवालयले जनाएको छ ।

यस्तै, मन्त्री भरतबहादुर केसीलाई कृषि, पशुपन्छी, वन तथा वातावरण मन्त्रालयको वन तथा वातावरण विषयगत (महाशाखा), मन्त्री विनु रायमाझी पौडेललाई आन्तरिक मामिला, कानुन तथा सहकारी मन्त्रालयको सहकारी विषयगत (महाशाखा) हेर्ने जिम्मेवारी पाएका छन् ।