व्यक्तिभन्दा नीति र प्रणाली देशभर पुग्नुपर्छ : रवि लामिछाने

चितवन । राष्ट्रिय स्वतन्त्र पार्टी (रास्वपा) का सभापति रवि लामिछानेले व्यक्तिकेन्द्रित राजनीतिक अभ्यासभन्दा नीति र प्रणालीलाई प्राथमिकता दिनुपर्ने बताएका छन् । आफू निर्वाचन क्षेत्रमा ढिलो पुगे पनि पार्टीको संरचना र सरकारका नीतिमार्फत काम अघि बढिरहेको उनको भनाइ छ ।

Watch On

भरतपुर विमानस्थलमा बिहीबार सञ्चारकर्मीसँग कुरा गर्दै चितवन क्षेत्र नं २ का प्रतिनिधिसभा सदस्यसमेत रहेका लामिछानेले जनप्रतिनिधिको भौतिक उपस्थितिभन्दा नीतिगत काम र प्रणालीको प्रभाव देशभर पुग्नु महत्त्वपूर्ण हुने बताए ।

‘जिम्मेवारी धेरै छ । तर व्यक्तिभन्दा सिस्टम आउनुपर्छ भन्ने सोचका कारण व्यक्तिका रूपमा म ढिला आए पनि सरकारको रूपमा, पार्टीको रूपमा पार्टीको संरचना र सरकारका नीतिहरू देशभर पुगिरहेका छन्’, उनले भने, ‘हाम्रो उद्देश्य पनि त्यही हो । व्यक्ति आउनुभन्दा पनि नीति आउनुपर्‍यो । राज्यको नीति आउने क्रम जारी छ ।’

आफ्नो निर्वाचन क्षेत्र चितवन आउन ढिलाइ भए पनि यहाँ नीतिगत कामहरू भइरहेको उनले बताए । राजनीतिक नेतृत्वको उपस्थिति मात्रलाई उपलब्धि मान्नुभन्दा संस्थागत संरचना र नीतिमार्फत जनतासम्म सेवा तथा काम पुग्नुपर्ने उनको भनाइ थियो ।

लामिछाने शुक्रबारसम्म चितवनका विभिन्न कार्यक्रममा सहभागी हुने कार्यक्रमसहित बिहीबार त्यहाँ पुगेका हुन् ।

रास्वपा चितवनका सभापति इन्जिनियर मिनिमाधव खनालका अनुसार चितवन पुगेपछि लामिछाने पार्टी कार्यालयमा जिल्ला, क्षेत्र र स्थानीय तहका पदाधिकारीसँग संगठनात्मक छलफलमा सहभागी हुने कार्यक्रम छ ।

त्यस्तै, शुक्रबार बिहान उनले नारायणी नदी किनारको कटान प्रभावित क्षेत्रको अवलोकन गर्ने र त्यससँग सम्बन्धित पक्षसँग छलफल गर्ने कार्यक्रम रहेको खनालले जानकारी दिए ।