सरकार र पार्टीबीच कुनै टसल छैन, हस्तक्षेप नगरी काम गर्न दिनुपर्छ : रवि लामिछाने

काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले पार्टी र सरकारबीच कुनै मतभेद वा आन्तरिक द्वन्द्व नरहेको दाबी गरेका छन्। उनले सरकारलाई स्वतन्त्र रूपमा काम गर्न दिनुपर्ने पार्टीको नीति रहेको भन्दै मन्त्रिपरिषद्को काममा पार्टीले हस्तक्षेप नगर्ने स्पष्ट पारेका छन्।

Watch On

बिहीबार आफ्नो निर्वाचन क्षेत्र चितवन पुगेका लामिछानेले सञ्चारकर्मीसँग कुरा गर्दै पार्टी र सरकारबीच निरन्तर संवाद, छलफल र समन्वय भइरहेको बताए। बाहिर चर्चा भएजस्तो पार्टी र सरकारबीच दूरी वा असमझदारी नरहेको उनको भनाइ छ।

सरकार सञ्चालनमा पार्टीको अनावश्यक हस्तक्षेप र मन्त्रीहरूमाथि नियन्त्रण गर्ने पुराना राजनीतिक दलहरूको अभ्यास रास्वपाले नअपनाउने उनले बताए। सरकारको नेतृत्व र पार्टीको जिम्मेवारी अलग-अलग रहने भन्दै उनले प्रधानमन्त्री वा मन्त्रीसँगै पार्टीको अर्को प्रतिनिधि राखेर सरकार सञ्चालन गर्ने अभ्यास आफूहरूलाई स्वीकार्य नभएको बताए।

‘हामी राजनीतिमा त्यो अभ्यासको पक्षमा छैनौँ, जहाँ सरकार टिकाउन वा पार्टी मिलाउन मन्त्रीको छेउमा अर्को मान्छे कुर्सी राखेर बस्नुपरोस्। सरकारले आफ्नो पूर्ण (एब्सोल्युट) काम गर्छ र पार्टीले आफ्नो काम गर्छ,’ उनले भने।

सरकारका कामकारबाहीबारे पार्टीभित्र कुनै जिज्ञासा वा प्रश्न उठे त्यसलाई संवाद र छलफलबाट सम्बोधन गरिने उनले बताए। पार्टी र सरकारबीच नियमित भेटघाट हुने गरेको उल्लेख गर्दै उनले समन्वयको अभाव नभएको दाबी गरे।

‘हाम्रो नियमित भेटघाट र संवाद भइरहन्छ। समन्वयको कुनै कमी छैन। सरकारलाई पूर्ण रूपमा काम गर्न दिनुपर्छ भन्ने पार्टीको स्पष्ट धारणा हो,’ लामिछानेले भने।

उनको भनाइमा पार्टीले सरकारका हरेक निर्णयमा समर्थन जनाउनुपर्ने वा सरकारले पार्टीका सबै धारणालाई स्वीकार गर्नुपर्ने अवस्था छैन। कुनै निर्णयबारे थप स्पष्टता आवश्यक परे पार्टीले प्रश्न उठाउन र सरकारसँग जवाफ माग्न सक्छ। तर त्यसलाई सरकार सञ्चालनमा हस्तक्षेपका रूपमा बुझ्न नहुने उनको तर्क छ।

पछिल्लो समय सञ्चारगृह र पत्रकारमाथि भएका प्रशासनिक गतिविधिबारे सञ्चारकर्मीले राखेको जिज्ञासामा लामिछानेले लोकतान्त्रिक मूल्य–मान्यता र प्रेस स्वतन्त्रताप्रति आफ्नो पार्टी प्रतिबद्ध रहेको बताए।

कुनै निकाय वा व्यक्तिबाट गल्ती भए त्यसलाई सच्याउने संवैधानिक तथा वैधानिक संस्थाहरू सक्रिय रहेको उल्लेख गर्दै उनले प्रहरी प्रशासन, अदालत र प्रेस काउन्सिलजस्ता संस्थामाथि विश्वास गर्नुपर्ने धारणा राखे।

‘यदि कसैले गलत गर्‍यो भने त्यसलाई करेक्सन गर्ने हाम्रा संस्थाहरू छन्। प्रहरी प्रशासन, अदालत र प्रेस काउन्सिलजस्ता निकायहरूलाई हामीले विश्वास गर्नुपर्छ र थप बलियो बनाउनुपर्छ,’ उनले भने।

कुनै संस्था आफ्नो जिम्मेवारी र निर्धारित सीमाभन्दा बाहिर गए त्यसलाई सही बाटोमा ल्याउने प्रयास पार्टीले गर्ने पनि उनले बताए। लोकतान्त्रिक व्यवस्थामा संस्थाहरूको भूमिका बलियो हुनुपर्ने र राज्यका निकायले विधिको शासनअनुसार काम गर्नुपर्ने उनको भनाइ थियो।

सरकार र पार्टीबीच टकराव रहेको भन्ने चर्चालाई लामिछानेले निराधार हल्लाको संज्ञा दिए। सरकारलाई काम गर्न पर्याप्त स्वतन्त्रता दिनुपर्ने र पार्टीले आफ्नो राजनीतिक तथा संगठनात्मक जिम्मेवारी निर्वाह गर्नुपर्ने उनको जोड थियो।

सरकारका कामकारबाहीमा प्रश्न उठ्ने अवस्था नै आउन नदिन विधिको शासन, संस्थागत मर्यादा र परिपक्व कार्यशैलीलाई प्राथमिकता दिनुपर्ने उनको धारणा छ।