बितेका दश वर्ष नेपाली राजनीतिका लागि कालो वर्षः सभापति थापा

काठमाडौँ । नेपाली काँग्रेसका सभापति गगन कुमार थापाले '२०७२ सालदेखि २०८२ सालसम्मको दश वर्ष' को समयलाई नेपाली राजनीतिका लागि कालो वर्ष भएको बताएका छन् ।

आइतबार ललितपुरमा ‘नयाँ पुस्तासँग नेपाली कांग्रेसका सभापति’ साक्षात्कार कार्यक्रम तथा सन्त नेता कृष्ण प्रसाद भट्टराईको सालिक अनावरण समारोहलाई सम्बोधन गर्ने क्रममा पार्टी सभापति थापाले २०८२ सालसम्मको दश वर्ष नेपाली राजनीतिका लागि कालो वर्षका रुपमा चित्रण गरेका हुन् ।

Watch On

उनले बितेका दश वर्ष राजनीति दलहरु सत्ता मोहबाट बाहिर निस्कन नस्कनु, सत्ता र शक्ति नै सबै कुरा हो ठान्नु, र त्यो भन्दा अरुकुरा केहि पनि छैन् भन्ने दलहरुलाई लाग्नुले राजनीतिक दलप्रति वर्तमान अवस्था सृजना भएको बताए ।

‘हामीले नै यसलाई के बनायौँ भने करिब करिब २०७२ देखि २०८२ सालसम्मको यो दश वर्षमा नेपाली राजनीतिका लागि कालावर्षहरु हुन् । र यी दश वर्षमा हामीले गम्भीर गल्तीहरु गरेका छौं । यी दश वर्ष हामीलाई कस्तो लाग्यो । सत्ता नै सबै कुरा हो । शक्ति नै सबै कुरा हो । त्यो भन्दा अरुकुरा केहि पनि छैन् । त्यसबाट बाहिर निस्कनु पर्छ,’ सभापति थापाले भने ।

उनले कांग्रेसभित्र एकता, अनुशासन र जनविश्वासलाई थप मजबुत बनाउन आवश्यक रहेको बताउँदै आगामी दिनमा पार्टीलाई नयाँ पुस्ताको अपेक्षा अनुसार रूपान्तरण गर्नुपर्ने धारणा व्यक्त गरेका थिए ।

सभापति थापाले लोकतान्त्रिक आन्दोलनका अग्रणी नेता तथा पूर्वप्रधानमन्त्री कृष्णप्रसाद भट्टराई (किशुनजी)ले स्थापित गरेको लोकतान्त्रिक मूल्य, आदर्श र नैतिक राजनीतिक संस्कृतिलाई व्यवहारमा उतार्नुपर्ने बताए ।