प्रदेश सरकार गठनमा कांग्रेसले सिद्धान्त बिर्संदैनः गगन थापा

काठमाडौँ । प्रदेश सरकार गठनको प्रक्रियामा नेपाली काँग्रेस पार्टीले आफ्नो सिद्धान्त नबिर्सने पार्टी सभापति गगन कुमार थापाले बताएका छन् । 

आइतबार ४४ औँ बिपी स्मृति सप्ताह तथा नेता कृष्णप्रसाद भट्टराईको सालिक अनावरण कार्यक्रमलाई सम्बोधन गर्दै सभापति थापाले प्रदेश सरकार गठनका विषयमा नेपाली काँग्रेसले आफ्नो सिद्धान्त नबिर्सने बताएका हुन् ।

Watch On

‘धेरै साथीहरूले आफूलाई प्रदेश सरकार गठनका कुराहरूमा सोधै हुनुन्थ्यो । तपाईँहरूको के हुन्छ भनेर मलाई परिणाम के हुन्छ थाहा छैन । तर पार्टीको सिद्धान्तको कुरामा नेपाली काँग्रेसले कुनै सम्झौता गर्दैन । हिजो हामीले गल्ती गर्‍यौँ अब हामीले गर्नु हुन्न,’ सभापति थापाले भने ।

तीन वटै पार्टी मिलेर प्रदेशमा सरकार बनाउनु पर्छ भन्ने प्रस्तावमा आफूहरूले यसलाई गलत भएको बताउँदै आएको सभापति थापाले बताए । यसरी प्रदेश सरकार मिलेर गराउने कुरा नागरिकले दिएको म्यान्डेट भन्दा फरक हुने बताएका थिए ।

‘तीन वटा पार्टी मिलेर सरकार बनाउँछु भनेको के हो ? प्रदेशको संसद्लाई प्रतिपक्ष विहीन बनाउनु हो । त्यसो गर्दै गर्दा खेरी एउटा काँग्रेसलाई सरकारमा बसिरहने कुरा त प्राप्त होला । तर सरकारमा बस्नै पर्छ र सरकार नै सबै कुरा हो भने सत्ता नै सबै कुरा हो भन्ने सोचले हामीलाई २०७२ सालदेखि कहाँ पुरायो,’ सभापति थापाले भने ।

त्यस्तै काँग्रेसभित्र एकता, अनुशासन र जनविश्वासलाई थप मजबुत बनाउन आवश्यक रहेको बताउँदै आगामी दिनमा पार्टीलाई नयाँ पुस्ताको अपेक्षा अनुसार रूपान्तरण गर्नुपर्ने धारणा व्यक्त गरेका थिए ।