हरिनगरमा शान्ति र सद्भाव कायम गर्न सर्वपक्षीय प्रतिबद्धता

काठमाडौं । सुनसरीको देवानगञ्ज गाउँपालिका–३ स्थित कप्तानगञ्जमा भएको गोलीकाण्ड र त्यसपछि उत्पन्न अशान्त वातावरणलाई सामान्य बनाउन हरिनगर गाउँपालिकामा सर्वपक्षीय तथा सर्वदलीय बैठक सम्पन्न भएको छ ।

गोलीकाण्डपछि उत्पन्न तनावका कारण भएका कुटपिट, तोडफोड, आगजनी, लुटपाट तथा धनमालको क्षति रोक्न स्थानीय जनप्रतिनिधि, राजनीतिक दलका प्रतिनिधि, बुद्धिजीवी, समाजसेवी र दुवै समुदायका अग्रजहरू एकजुट भएका छन् । सर्वपक्षीय बैठकले पालिकाभित्र सामाजिक सद्भाव, एकता र शान्तिसुरक्षा कायम राख्न सबै पक्ष तयार रहेको निर्णय गरेको छ ।

Watch On

अशान्ति र हिंसामा पूर्ण रोक लगाउन हरिनगर गाउँपालिकाका ७ वटै वडामा कुनै पनि प्रकारका अशान्ति, होहल्ला, नारा-जुलुस, कुटपिट, तोडफोड र आगजनीजस्ता हिंसात्मक गतिविधि हुन नदिने सबै पक्षले प्रतिबद्धता जनाएका छन् । साथै, समाजमा फेरि कुनै अप्रिय घटना नघटोस् भन्नका लागि अग्रज तथा प्रतिनिधिहरूले आ-आफ्नो गाउँ, टोल र वडा तहमा युवाहरूलाई संयमित रहन मार्गदर्शन गर्दै शान्ति स्थापनामा परिचालन गर्ने प्रतिबद्धता व्यक्त गरेका छन् ।

सबै पक्षले सार्वजनिक तथा आवतजावतको सुरक्षाका लागि आजैका मितिदेखि सडक, बाटो वा सार्वजनिक स्थलहरूमा एक-अर्काप्रति लक्षित कुनै पनि आक्रमण वा दुर्व्यवहार हुन नदिने र आपसी सद्भाव कायम राख्ने सहमतिसमेत गरेका छन् ।

हरिनगर गाउँपालिकाका अध्यक्ष गफार अन्सारीले सबै जातजाति र समुदायलाई संयमित भई सामाजिक सद्भाव, शान्ति र एकता कायम राख्न अपिल गरेका छन् । हरिनगरमा कुनै पनि हालतमा शान्तिसुरक्षा खलबलिन नदिने दाबी गर्दै उहाँले नेपाल प्रहरी र स्थानीय प्रशासनलाई कडा सुरक्षा व्यवस्था मिलाउन निर्देशन दिइसकेको जानकारी दिए ।

आम जनताले प्रत्यक्ष अनुभूत गर्ने गरी सुरक्षाको प्रत्याभूति दिलाइने आश्वासन दिँदै उनले समाजमा अशान्ति फैलाउने छुट कसैलाई नभएको र त्यस्ता गतिविधि गर्नेमाथि कडा कानुनी कारबाही गरिने स्पष्ट पारे । साथै, उनले सम्पूर्ण हरिनगरवासी दाजुभाइ तथा दिदीबहिनीहरूलाई कुनै पनि प्रकारका अफवाहको पछाडि नलाग्न, अशान्ति नफैलाउन र आ-आफ्नो ठाउँबाट शान्ति र सुरक्षाका लागि एक-अर्कालाई सहयोग गर्न हार्दिक अनुरोध गरेका छन् ।

विगतका घटनाबाट पाठ सिक्दै गाउँपालिकाका सबै सरोकारवालाहरू एउटै मञ्चमा उभिएर शान्ति स्थापनाको साझा संकल्प लिएका छन् । स्थानीय प्रशासन र जनप्रतिनिधिहरूको यो तदारुकताले कप्तानगञ्ज घटनापछिको त्रास र तनाव हट्ने तथा हरिनगरमा पुनः पुरानै भाइचारा कायम हुने अपेक्षा गरिएको छ ।