कोशीमा हिक्मतविरुद्ध अविश्वास प्रस्ताव दर्ता गराउने शेरधनको तयारी

विराटनगर । एमाले शीर्ष नेतृत्वका बीचमा कोशी प्रदेशको मुख्यमन्त्री हिक्मतकुमार कार्कीलाई नै निरन्तरता दिने सहमति भए पनि नयाँ खेल सुरु भएको छ । र, नयाँ खेलको नेतृत्व गरेका एमाले सचिव एवम् पूर्वमुख्यमन्त्री शेरधन राईले ।

कोशीमा नेपाली कम्युनिस्ट पार्टी(नेकपा) सहितको सरकार निर्माणका लागि मुख्यमन्त्री कार्कीले मन्त्रिपरिषद पुनर्गठनको तयारी गरिरहेका बेला एमाले अध्यक्ष केपी शर्मा ओलीकै आदेशमा सचिव शेरधन राईले मुख्यमन्त्री कार्कीविरुद्ध प्रदेश सभामा अविश्वास प्रस्ताव दर्ता गराउने तयारी गरेका छन् । त्यसका लागि उनले पार्टीका केही प्रदेश सभा सदस्यहरुको हस्ताक्षरसमेत संकलन गरिसकेको एमालेका नेताहरुले बताएका छन् ।

Watch On

कार्कीलाई मुख्यमन्त्रीबाट हटाएर ताप्लेजुङका तीलकुमार मेन्याङ्बोलाई मुख्यमन्त्री बनाउने ‘मिसन’मा लागेका राईले हिजो कार्कीसँग छलफल गरेका थिए । अध्यक्ष ओली मुख्यमन्त्री परिवर्तन गर्ने पक्षमा रहनु भएको र त्यसैका लागि आफू विराटनगर आएको उनले कार्कीलाई सुनाएका थिए । शेरधनले ‘तपाईंले  राजीनामा दिएर मार्ग प्रशस्त गरिदिनुस्’ भनेर कार्कीलाई अध्यक्षको सन्देश सुनाएका थिए ।

तर, कार्कीले राजीनामा नदिने अडान दोहोर्‍याए । शेरधन र हिक्मत दुवै एमाले सचिव हुन्। 

त्यसपछि राईले कार्कीविरुद्ध अविश्वास प्रस्ताव दर्ता गराउने नयाँ खेल सुरु गरेका हुन् । त्यसका लागि उनले प्रदेशसभा सदस्यहरुसँग भेटघाट तीव्र पारेका छन् ।

९२ सदस्यीय कोशी प्रदेश सभामा एमालेका ४० सदस्य छन् । नेकपासँग १७ सदस्य छन् ।

अध्यक्ष ओलीको निर्देशनमा राईले कार्कीविरुद्ध अविश्वास प्रस्ताव दर्ता गराउनेसम्मको अभियान चलाइरहँदा उनले उपाध्यक्ष विष्णु पौडेल र महासचिव शंकर पोखरेलसँग भने समन्वय गरेका छैनन् । 

यसअघि हिक्मत कार्कीलाई मुख्यमन्त्रीमा निरन्तरता दिन ओली, पौडेल र पोखरेलबीच सहमति हुँदा राई सहभागी थिएनन् । उनले यसबीचमा उपाध्यक्ष पौडेल र महासचिव पोखरेलसँग छलफल गरेर कार्कीलाई मुख्यमन्त्री बनाउन आफू पनि तयार रहेको बताएका थिए । 

सचिव राई एमाले कोशीका इन्चार्ज पनि हुन् ।