रास्वपाले सांसदहरूको हाजिरी विश्लेषण गर्ने

काठमाडौं । राष्ट्रिय स्वतन्त्र पार्टी (रास्वपा) संसदीय दलले संसद् बैठकमा सांसदहरूको उपस्थितिको विश्लेषण गर्ने भएको छ ।

संसद्मा अपेक्षित उपस्थिति नदेखिएको, बैठक सुरु हुँदा उपस्थित भए पनि बीचमै संसद् छाडेर जाने क्रम बढेको भन्दै रास्वपाले सांसदहरूको हाजिरी विश्लेषण गर्न लागेको हो । यसले संसद्को गरिमा र प्रभावकारितामाथि प्रश्न उठ्ने अवस्था देखिएको भन्दै पार्टीले यस्तो निर्णय गरेको जनाएको छ ।

Watch On

रास्वपा संसदीय दलका मुख्य सचेतक कविन्द्र बुर्लाकोटीले संसद् सचिवालयबाट हाजिरी विवरण झिकाएर विश्लेषण गर्न सचेतकद्वय प्रकाशचन्द्र परियार र क्रान्तिशिखा धिताललाई जिम्मेवारी दिएका छन् ।

उनीहरूलाई सात दिनभित्र हाजिरी विश्लेषणसहितको प्रतिवेदन पेस गर्न भनिएको छ ।

रास्वपाले विशेषगरी पछिल्ला पाँचवटा प्रतिनिधिसभा बैठकको हाजिरी विश्लेषण गर्ने भएको छ । ती बैठकहरूमा २०८३ असार ३० र ३१ गते तथा साउन १४, १८ र २२ गते बसेका प्रतिनिधिसभा बैठक समावेश छन् ।

मुख्य सचेतक बुर्लाकोटीले संसद्मा सांसदहरूको उपस्थिति र बैठकमा उनीहरूको सहभागिताको अवस्थाबारे तथ्यमा आधारित समीक्षा गर्न हाजिरी विवरण विश्लेषण गर्न लागिएको बताएका छन् ।

पार्टीले सांसदहरू बैठकको सुरुदेखि अन्त्यसम्म उपस्थित रहने, छलफलमा सक्रिय सहभागी हुने र संसद्को गरिमा कायम राख्ने विषयलाई प्राथमिकतामा राख्दै आएको जनाएको छ ।