अर्थमन्त्री वाग्लेले २० ठूला बहुराष्ट्रिय कम्पनीका प्रतिनिधिसँग छलफल गर्दै

काठमाडौं । अर्थमन्त्री डा. स्वर्णिम वाग्लेले नेपालमा लगानी गरेका २० ठूला करदाता बहुराष्ट्रिय कम्पनीका प्रतिनिधिसँग सोमबार छलफल गर्दैछन् ।

आर्थिक वर्ष २०८३/८४ को बजेट कार्यान्वयनसम्बन्धी छलफल शृंखलाअन्तर्गत अर्थ मन्त्रालयको सुवर्ण हलमा मध्याह्न १२ बजे छलफल सुरु हुने भएको हो ।

Watch On

छलफलमा बहुराष्ट्रिय कम्पनीका उच्चपदस्थ स्वदेशी तथा विदेशी प्रतिनिधिलाई बोलाइएको छ । अर्थमन्त्री वाग्लेले बजेटमार्फत दिइएका सुविधा, लगानीका क्रममा भोगिरहेका समस्या, लगानी विस्तार, रोजगारी सिर्जना तथा मुनाफा र प्रतिफल स्वदेशबाट लैजाने क्रममा देखिएका विषयबारे कम्पनीका प्रतिनिधिको धारणा सुन्नेछन् ।

कम्पनीका प्रतिनिधिलाई लगानीको वातावरण सुधारका लागि सरकारले गर्नुपर्ने सहजीकरणबारे खुलस्त सुझाव दिन आग्रह गरिनेछ । उनीहरूलाई आफ्ना समस्या र सुझाव लिखित रूपमा समेत पेस गर्न भनिनेछ ।

बजेट कार्यान्वयनसम्बन्धी छलफल शृंखलाअन्तर्गत अर्थमन्त्री वाग्लेले यसअघि नेपालमा उत्पादनमूलक उद्योग सञ्चालन गरी ठूलो संख्यामा रोजगारी सिर्जना गरेका तथा अर्थतन्त्रमा महत्वपूर्ण योगदान पुर्‍याएका ३३ औद्योगिक घरानाका प्रतिनिधिसँग छलफल गरिसकेका छन् ।

यस्तै, उनले ‘क’ वर्गका वाणिज्य बैंकका प्रमुख कार्यकारी अधिकृत तथा नेपाल राष्ट्र बैंकका कार्यकारी निर्देशकहरूसँग पनि छलफल गरिसकेका छन् ।

सरकारले बजेट कार्यान्वयनलाई प्रभावकारी बनाउन निजी क्षेत्र, बैंकिङ क्षेत्र तथा ठूला लगानीकर्तासँग प्रत्यक्ष संवाद गर्दै उनीहरूका समस्या र सुझाव समेट्ने प्रयास गरिरहेको अर्थ मन्त्रालयले जनाएको छ ।