कञ्चनपुरमा अटो र स्कुटर ठोक्किँदा बालकसहित सात जना घाइते, दुईको अवस्था गम्भीर

कञ्चनपुर । कञ्चनपुरको बेलडाँडी गाउँपालिका–२ स्थित शुक्लाफाँटा आरक्षको जंगलभित्रको सडकमा अटो र स्कुटर एकआपसमा ठोक्किँदा एक बालकसहित सात जना घाइते भएका छन्। घाइतेमध्ये दुई जनाको अवस्था गम्भीर रहेको छ।

Watch On

बेलडाँडी गाउँपालिका–२ को क्याम्पबाट करिब एक किलोमिटर टाढा बुधबार दुर्घटना भएको हो। दैजीबाट बेलडाँडीतर्फ आउँदै गरेको सुपप्र ०२–००४ प ६५६५ नम्बरको स्कुटर र बेलडाँडीबाट दैजीतर्फ जाँदै गरेको भिनपा ००१ ह ५२२ नम्बरको अटो एकआपसमा ठोक्किएका थिए।

दुर्घटनामा स्कुटर चालक बेलडाँडी गाउँपालिका–२ का ४० वर्षीय दिनेश खाती र उनका छ वर्षीय छोरा अर्थक खाती घाइते भएका छन्। दिनेशको अवस्था सामान्य छ भने अर्थकको अवस्था गम्भीर रहेको प्रहरीले जनाएको छ। उनलाई थप उपचारका लागि धनगढीस्थित निसर्ग अस्पताल पठाइएको छ।

त्यस्तै, अटो चालक बेलडाँडी गाउँपालिका–१ सिद्धचोकका ४५ वर्षीय ललित सिंह ठकुराठी गम्भीर घाइते भएका छन्। उनलाई थप उपचारका लागि धनगढीस्थित मायामेट्रो अस्पताल पठाइएको छ।

अटोमा सवार उनका १८ वर्षीय छोरा हिक्मत ठकुराठी र १५ वर्षीया आशिका ठकुराठी मध्यम घाइते भएका छन्। उनीहरूलाई पनि थप उपचारका लागि मायामेट्रो अस्पताल पठाइएको छ।

अटोमा सवार ३६ वर्षीया सुशिला ठकुराठीको अवस्था सामान्य छ भने २५ वर्षीया शोभा डाँगाको अवस्था मध्यम रहेको छ।

दुर्घटनालगत्तै इलाका प्रहरी कार्यालय बेलडाँडीबाट प्रहरी निरीक्षक जय पार्कीको कमान्डमा सात जनाको प्रहरी टोली घटनास्थलमा खटिएको थियो। घाइते सबैलाई सुरुमा उपचारका लागि महाकाली प्रादेशिक अस्पताल महेन्द्रनगर पठाइएको थियो।

दुर्घटनामा संलग्न अटो र स्कुटर प्रहरीले नियन्त्रणमा लिएको छ। घटनास्थल इलाका प्रहरी कार्यालय बेलडाँडीबाट करिब पाँच किलोमिटर उत्तरमा पर्छ। दुर्घटनाबारे थप अनुसन्धान भइरहेको प्रहरीले जनाएको छ।