नेपालको युवा जनसङ्ख्या चुनौती होइन, विकासको ऐतिहासिक अवसर हो : मन्त्री यादव

काठमाडौं । युवा, श्रम तथा रोजगारमन्त्री रामजी यादवले नेपालको ठूलो युवा जनसङ्ख्या चुनौती नभई देश विकासका लागि ऐतिहासिक अवसर भएको बताएका छन् ।

प्रतिनिधि सभामा ‘बाल श्रम (निषेध तथा नियमन गर्ने) विधेयक, २०८३’ प्रस्तुत गर्दै मन्त्री यादवले युवाको ऊर्जा, सीप र क्षमतालाई सही दिशामा परिचालन गर्न सके आर्थिक रूपान्तरणको मुख्य शक्ति युवा पुस्ता बन्ने बताए ।

Watch On

सरकारले युवासम्बन्धी कार्यक्रमलाई राष्ट्रिय प्राथमिकतासँग जोड्न मन्त्रालयलाई समन्वय र नेतृत्वको जिम्मेवारी दिएको उनले जानकारी दिए । आगामी दशकमा युवालाई आत्मनिर्भर र प्रतिस्पर्धी बनाउन ‘युवा नीति २०८२’ कार्यान्वयनमा ल्याइएको र राष्ट्रिय युवा परिषद् ऐन, २०७२ को समेत समसामयिक पुनरावलोकन भइरहेको उनले बताए ।

मन्त्री यादवका अनुसार सरकारले ‘रोजगार प्रवर्द्धन दशक’ लाई प्राथमिकतामा राख्दै स्वदेशमै रोजगारीका अवसर सिर्जना गर्ने लक्ष्य लिएको छ । राष्ट्रिय अप्रेन्टिसिप कार्यक्रम र ‘करियर उडान’ सञ्चालन गर्नुका साथै एआई बिजनेस डेभलपमेन्ट, विद्युतीय सवारी मर्मत, निर्माण तथा केयर इकोनोमीलगायत क्षेत्रमा विशेष सीप विकास तालिम सञ्चालन गरिनेछ ।

युवालाई उद्यमशीलतासँग जोड्न स्थानीय तहका रोजगार सेवा केन्द्रलाई ‘रोजगार सीप तथा उद्यमशीलता केन्द्र’ का रूपमा रूपान्तरण गरिएको पनि उनले जानकारी दिए । साथै सहिद परिवार, जनआन्दोलनका घाइते, अपाङ्गता भएका व्यक्ति, सुकुम्बासी तथा सीमान्तकृत समुदायलाई कार्यस्थलमा आधारित सीप विकास तालिम दिइने उनले बताए ।

'नेपालको ठूलो युवा जनसङ्ख्या चुनौती मात्र होइन, ऐतिहासिक अवसर हो । युवाको ऊर्जा र सीपलाई सही दिशामा परिचालन गर्न सके देशको आर्थिक रूपान्तरणको मुख्य शक्ति युवा पुस्ता नै बन्नेछ,' मन्त्री यादवले भने ।