मातृभाषामा सूचना र सञ्चारको पहुँचले लोकतन्त्र थप समावेशी हुन्छ : मन्त्री गौतम

काठमाडौं । कानून, न्याय तथा संसदीय मामिला मन्त्री सोविता गौतमले नागरिकले आफ्नै मातृभाषामा सूचना र सञ्चारको पहुँच पाए मात्रै लोकतन्त्र थप समावेशी र सुदृढ हुने बताएकी छन् ।

तेस्रो अन्तर्राष्ट्रिय मातृभाषा पत्रकारिता सम्मेलन–२०२६ को उद्घाटन गर्दै मन्त्री गौतमले नेपालका परम्परा, संस्कृति र पुस्तौँदेखि बोलिँदै आएका मातृभाषा देशको पहिचानका आधार भएको बताइन् ।

Watch On

बहुभाषिक र बहुसांस्कृतिक मुलुक भएकाले भाषिक विविधताको संरक्षण राज्य र समाज दुवैको साझा दायित्व भएको उनको भनाइ थियो । नागरिकलाई आफ्नै भाषामा राज्यका गतिविधि, नीति र निर्णयबारे जानकारी गराउन मातृभाषा पत्रकारिताको महत्वपूर्ण भूमिका रहेको उनले बताइन् ।

‘कुनै पनि समाजमा लोकतन्त्र त्यतिबेला मात्र बलियो हुन्छ, जतिबेला नागरिकले आफ्नै मातृभाषामा आफूलाई सुसूचित हुने अवसर पाउँछन्,’ उनले भनिन्, ‘नागरिक र राज्यबीचको सूचना तथा बुझाइको दूरी कम गर्ने महत्वपूर्ण जिम्मेवारी पत्रकारको पनि हो ।’

मन्त्री गौतमले मातृभाषामा पत्रकारिता गर्नु भाषाको संरक्षण मात्र नभई त्यसको पुस्तान्तरण र दैनिक प्रयोगलाई निरन्तरता दिनु पनि भएको बताइन् । भाषालाई संग्रहालयमा सुरक्षित गरेर मात्र नपुग्ने भन्दै उनले सञ्चार, सार्वजनिक संवाद र दैनिक जीवनमा यसको प्रयोग बढाउनुपर्नेमा जोड दिइन् ।

मिथिला क्षेत्रमा बस्ने वा हिमाली क्षेत्रमा भेडा चराउने नागरिकले समेत राज्यले के गरिरहेको छ भन्ने कुरा आफ्नै भाषामा थाहा पाउने अधिकार राख्ने उनको भनाइ थियो ।

मातृभाषामा पत्रकारिता गरिरहेका सञ्चारकर्मीलाई आवश्यक सहयोग र सहजीकरण गर्न सरकार सकारात्मक रहेको उल्लेख गर्दै मन्त्री गौतमले राज्यका तर्फबाट गर्नुपर्ने काम गर्न सरकार प्रतिबद्ध रहेको बताइन् ।

सम्मेलनमा विभिन्न देशका पत्रकार सहभागी भएकामा खुसी व्यक्त गर्दै उनले अन्तर्राष्ट्रिय अनुभवको आदानप्रदानले नेपालमा मातृभाषा पत्रकारितालाई थप सुदृढ बनाउन सहयोग पुग्ने विश्वास व्यक्त गरिन् ।