निजी क्षेत्रको नाफा र पुनःलगानीको चक्र तीव्र बनाउनु सरकारको प्राथमिकता : अर्थमन्त्री वाग्ले

काठमाडौं । अर्थमन्त्री डा. स्वर्णिम वाग्लेले सरकार निजी क्षेत्रलाई शङ्काको दृष्टिले नभई राष्ट्र निर्माणको साझेदारका रूपमा हेर्ने बताएका छन् ।

नेपालमा लगानी गरेका ठूला उद्योगी तथा व्यवसायी संस्थाका प्रतिनिधिसँगको छलफलमा अर्थमन्त्री वाग्लेले निजी क्षेत्रको सफलता नै नेपालको आर्थिक सफलताको आधार भएको बताए । उनले अब सरकारको प्राथमिकता कर संकलन बढाउनु मात्र नभई उत्पादन, लगानी, नाफा र पुनःलगानीको चक्र तीव्र बनाउनु रहेको स्पष्ट पारे ।

Watch On

‘जब उद्योगले नाफा कमाउँछ, त्यही नाफा पुनःलगानी हुन्छ । पुनःलगानीले उत्पादन बढाउँछ, उत्पादनले रोजगारी सिर्जना गर्छ र रोजगारीले आम्दानी तथा बजार विस्तार गर्छ,’ उनले भने, ‘अन्ततः त्यसबाट राज्यको राजस्व पनि बढ्छ ।’

नेपालमा वैध रूपमा गरिएको लगानी, सिर्जना गरिएको सम्पत्ति र आर्जन गरिएको नाफाको सुरक्षा गर्नु सरकारको प्रमुख दायित्व भएको उनले बताए । लगानीकर्ताले आफ्नो सम्पत्ति सुरक्षित, नियम स्थिर र कर प्रणाली पूर्वानुमेय रहेको विश्वास गर्न सक्ने वातावरण बनाउन सरकार प्रतिबद्ध रहेको उनको भनाइ थियो ।

अर्थमन्त्री वाग्लेले निजी क्षेत्रलाई नेपालमा थप लगानी गर्न, भएका उद्योग विस्तार गर्न, नयाँ उत्पादन र प्रविधिमा प्रवेश गर्न तथा रोजगारी सिर्जना गर्न आग्रह गरे । त्यसका लागि सरकार साथमा उभिने उनले प्रतिबद्धता जनाए ।

उनले व्यवसाय विस्तारका क्रममा देखिएका कर प्रशासन, नियमन, जग्गा, ऊर्जा, श्रम, पूर्वाधार, वित्त, निर्यात तथा सरकारी प्रक्रियासम्बन्धी अवरोधबारे व्यवसायीबाट स्पष्ट धारणा मागे । आगामी छ महिनाभित्र सरकारले गर्नुपर्ने महत्वपूर्ण पाँच निर्णय पहिचान गरी समाधानको कार्यसूची बनाउन आफूले चाहेको उनले बताए ।

बैठकमा उठेका विषय कार्यान्वयनका लागि सम्बन्धित मन्त्रालयसँग समयबद्ध समन्वय गरिने र अर्थ मन्त्रालयले ‘रिस्पोन्स डेस्क’मार्फत निरन्तर अनुगमन गर्ने उनले जानकारी दिए ।

‘सरकारले कर तिर्नेलाई केवल राजस्वको स्रोतका रूपमा होइन, राष्ट्र निर्माणको साझेदारका रूपमा सम्मान गर्छ,’ वाग्लेले भने ।

उनले आगामी दशकलाई नेपालमा ठूलो लगानी, ठूलो उत्पादन, ठूलो रोजगारी र ठूलो आत्मविश्वासको दशक बनाउने गरी सरकार र निजी क्षेत्रबीचको साझेदारी सुदृढ गर्नुपर्नेमा जोड दिए ।