समिति बैठकमा प्रेम सुवालले आरजुलाई भने ‘बीपी कोइरालाको प्रतिष्ठान नै बेच्नुभयो ' (भिडियो सहित)

काठमाडौँ । सोमबार सिंहदरबारमा संघीय संसद्को कृषि, सहकारी तथा प्राकृतिक स्रोत समितिको बैठक बसेको थियो । बैठकमा समितिका सदस्य प्रेम सुवाल आफ्नो भनाई राखिरहेका थिए । सुवालले नेपालमा पाइने औषधि कम गुणस्तरीय भएको भन्दै आफ्नो भनाई राखिरहेका थिए ।

उक्त क्रममा समितिकी सभापति आरजु राणाले उनलाई रोक्दै पोइन्टमा कुरा राख्न भनिन् । त्यसपछि प्रेम सुवाल आक्रोसित बने । आरजु राणाले सांसद सुवाललाई पोइन्ट टु पोइन्ट बोल्नुस भनेपछि सुवाल टेबल ठटाएर बोल्दिनँ भन्दै हिँडे ।  

साभापति राणाले सांसद सुवाललाई थमथम्याउने प्रयास गरेपनि सकिनन् । सुवाल आक्रोसित हुँदै सिंहदबार कब्जा गर्न पाएपछि मात्रै खुसी हुने भन्दै थप पड्किए । त्यतिमात्र हैन राणाप्रति इंगित गर्दै उनले भने, ‘बीपी कोइरालाको त बीपी प्रतिष्ठान नै बेच्नुभयो नि। सबै थाहा छ हामीलाई। सभापतिजीले ठूलो कुरा गर्न पर्दैन। कुन प्रधानमन्त्रीको पालामा कति भ्रष्टाचार भयो सबै थाहा छ हामीलाई।’

सुवाल त्यतिमै रोकिएनन् । उनले नेपाली युवाहरुलाई तपाईँहरुले नै विदेश पठाएको भन्दै थपे, ‘तपाईँहरूले युवाजति ८० लाख विदेश पठाउनुभयो। म त बोलिरहेको छु नि, किन रोक्नुभयो ?’

सांसद सुवाल रिसाएर टेबल ठटाएर उठेर हिँड्दैगर्दा अन्य सांसद र समिति सभापतिले सांसद सुवाललाई ‘त्यस्तो हैन, बस्नुस भन्नबाहेक केही गर्न सकेनन् ।’