बाढीपहिरोको जोखिम बढेपछि २५ जिल्लामा दुई दिन सवारी सञ्चालनमा रोक

काठमाडौँ । लगातारको वर्षासँगै बाढीपहिरोको जोखिम बढेपछि सरकारले मध्य र पश्चिम नेपालका २५ जिल्लामा दुई दिन सवारीसाधन सञ्चालनमा रोक लगाएको छ।

Watch On

राष्ट्रिय विपद् जोखिम न्यूनीकरण तथा व्यवस्थापन प्राधिकरण (एनडीआरआरएमए) को निर्णयअनुसार शुक्रबार र शनिबार ती जिल्लालाई ‘रेड अलर्ट’मा राख्दै सवारीसाधन सञ्चालनमा रोक लगाइएको हो।

अविरल वर्षाका कारण बाढी, पहिरो तथा सडक अवरुद्ध हुनसक्ने र त्यसबाट सम्भावित दुर्घटना तथा क्षति हुनसक्ने जोखिमलाई ध्यानमा राखेर तराई, भित्री मधेस, पहाड तथा हिमाली क्षेत्रका २५ जिल्लामा सवारी सञ्चालन रोकिएको हो।

यी हुन् सवारी सञ्चालनमा रोक लगाइएका २५ जिल्ला

तराईका ६ जिल्लाः रुपन्देही, कपिलवस्तु, बाँके, बर्दिया, कैलाली र कञ्चनपुर

पहाडी तथा भित्री मधेसका ७ जिल्लाः पाल्पा, अर्घाखाँची, गुल्मी, स्याङ्जा, प्युठान, दाङ र सुर्खेत

उच्च पहाडी तथा हिमाली १२ जिल्लाः गोरखा, लमजुङ, मनाङ, मुस्ताङ, डोल्पा, जुम्ला, कालीकोट, मुगु, हुम्ला, बझाङ, बाजुरा र दार्चुला

यसरी तराईका ६, पहाडी तथा भित्री मधेसका ७ र उच्च पहाडी तथा हिमाली क्षेत्रका १२ गरी कुल २५ जिल्लामा दुई दिन सवारी सञ्चालनमा रोक लगाइएको हो।

प्राधिकरणले रेड अलर्टमा राखिएका २५ जिल्लाबाहेक अन्य जोखिमयुक्त क्षेत्रमा समेत रातिको समयमा सवारीसाधन सञ्चालन नगर्न आग्रह गरेको छ। दिउँसो भने सडकको अवस्था हेरेर मात्र सवारी सञ्चालन गर्न भनिएको छ।

अत्यावश्यक कामबाहेक यात्रा नगर्न र बाढी, पहिरो तथा अन्य विपद्को जोखिमबाट बच्न उच्च सतर्कता अपनाउन प्राधिकरणले सर्वसाधारणलाई आग्रह गरेको छ।