अरुण चौधरीलाई पक्राउ गर्ने निर्णय फिर्ता लिन निजी क्षेत्रको माग

काठमाडौँ । नेपाल उद्योग परिसंघ, नेपाल उद्योग वाणिज्य महासंघ लगायतका संघ संस्थाले सीजी होल्डिङ्सका अध्यक्ष तथा प्रबन्ध निर्देशक अरुण चौधरीलाई पक्राउ गरिएकोमा बिरोध गरेका छन् । उनीहरुले चौधरीमाथि लगाइएको आरोप प्रमाणित भएपछि मात्रै पक्राउ गर्नुपर्ने तर्क गर्दै केन्द्रीय अनुसन्धान ब्युरोको कदम सच्याउनुपर्ने माग समेत राखेका छन् । 

Watch On

चौधरी पक्राउ परेपछि निजी क्षेत्रका व्यवसायीहरुले पत्रकार सम्मेलन गर्दै सरकारको कदमको बिरोध गरेका हुन् । सो क्रममा उद्योग परिसंघका अध्यक्ष राजेश कुमार अग्रवालले चौधरी प्रतिष्ठित उद्यमी भएकाले भाग्ने सम्भावना नै नरहेकाले बिना सूचना पक्राउ गर्नु विधिको शासनमाथिको खेलबाड भएको बताए । अग्रवालले भने, ‘सरकारको कदमले सम्पूर्ण उद्योगी–व्यवसायीको मानमर्दन भएको हामीले महशुस गरेका छौँ । कसुर प्रमाणित भए दोषी व्यक्ति कारबाहीको भागिदार हुनुपर्छ भन्नेमा हाम्रो पनि विमत्ति छैन । तर शंकाकै भरमा उसको वैयक्तिक स्वतन्त्रताको हनन् हुने गरी पक्राउ गर्ने कार्य न्यायसंगत भएन ।’

उनीहरुले चौधरी पक्राउपछि सरकारले निजीक्षेत्रको योगदानलाई उपेक्षा गरेको शंका गर्ने अवस्था आएको बताएका छन् । 

बाँसबारी छालाजुत्ता कारखानाको १० रोपनी जग्गा सीजी रेसिडेन्सी प्रालिको नाममा नामसारी गरेको घटनामा अनुसन्धानका लागि उनलाई पक्राउ सीआईबीले पक्राउ गरेको हो । 

प्रहरीले सिजी होल्डिङका प्रबन्ध निर्देशक अरुण चौधरी, छाला जुत्ता कारखानाका तत्कालीन सञ्चालक समिति अध्यक्ष अजित नारायणसिंह थापा र आम्रपाली कन्ट्रक्सनका सञ्जय ठाकुरलाई पनि पक्राउ गरेको छ । थापा कार्यकारी प्रमुख भएका बेला बाँसबारी छाला जुत्ता कारखानाको जग्गा बेच्ने निर्णय भएको थियो ।