अवरोध न भीडभाड, सहज दसैं यात्रा (तस्बिरहरू)

काठमाडौँ । दसैँको समयमा घर जाने तथा फर्किने यात्रुका लागि पृथ्वी राजमार्गको यात्रा सहज बनेको छ। भोटेकोशीमा आएको बाढीका कारण क्षतिग्रस्त सडक मर्मत सम्पन्न भएसँगै पृथ्वी राजमार्गमा अहिले निर्बाध रूपमा सवारीसाधन सञ्चालन भइरहेका छन्।

Watch On

केही समयअघि बाढी तथा पहिरोका कारण धादिङको कृष्णभीर, परेवा भीर र गलौंदी क्षेत्रमा सडक भासिएपछि पृथ्वी राजमार्ग पूर्ण रूपमा अवरुद्ध भएको थियो। सडक अवरुद्ध हुँदा काठमाडौं भित्रिने र बाहिरिने यात्रु तथा मालवाहक सवारीसाधनले सास्ती खेप्नुपरेको थियो। सडक मर्मत सम्पन्न भएपछि भने यातायात सञ्चालन सहज भएको छ।

संघीय राजधानी काठमाडौंलाई देशका विभिन्न जिल्ला तथा पश्चिम नेपालका प्रमुख सहरसँग जोड्ने महत्वपूर्ण सडकका रूपमा रहेको पृथ्वी राजमार्गमा दसैँका बेला यात्रुको चाप बढ्ने गर्छ। दसैं मनाउन राजधानीबाट लाखौँ मानिस घर जाने र पर्वपछि फर्किने भएकाले यस सडकमा सवारीसाधनको चाप उल्लेख्य हुने गरेको छ।

मनसुन सुरु भएसँगै बाढी, पहिरो र सडक भासिने समस्याले पृथ्वी राजमार्गमा पटकपटक यातायात प्रभावित हुने गरेको छ। विशेषगरी धादिङको कृष्णभीर, परेवा भीरलगायत जोखिमयुक्त क्षेत्रमा वर्षाका कारण सडक अवरुद्ध हुँदा लामो दूरीका यात्रु समस्यामा पर्ने गरेका छन्।

यसपटक दसैँको मुख्य समयमा सडक मर्मत सम्पन्न भई यातायात सञ्चालन सहज बनेपछि यात्रुलाई राहत मिलेको छ। यद्यपि, पहिरोको जोखिम पूर्ण रूपमा हटिनसकेकाले यात्रुले यात्रा गर्नुअघि सडकको अवस्था बुझ्न र ट्राफिक नियम पालना गर्न आवश्यक छ। (नेपाल फोटो लाइब्रेरी)