एनपीएललाई आईसीसीको मान्यता ऐतिहासिक उपलब्धि : कर्णाली याक्सका अध्यक्ष

काठमाडौँ । अन्तर्राष्ट्रिय क्रिकेट परिषद् (आईसीसी)ले नेपाल प्रिमियर लिग (एनपीएल)लाई औपचारिक मान्यता दिएको निर्णयलाई कर्णाली याक्सले स्वागत गरेको छ। क्लबले यसलाई नेपाली क्रिकेटको विकासका लागि ऐतिहासिक उपलब्धि भनेको छ।

Watch On

कर्णाली याक्सका अध्यक्ष गृहेन्द्र घिमिरेले सोमबार वक्तव्य जारी गर्दै आईसीसीको मान्यताले नेपाली क्रिकेटको विकास, विस्तार र घरेलु प्रतियोगिताको अन्तर्राष्ट्रिय पहिचान मजबुत बनाउन महत्त्वपूर्ण योगदान पुग्ने विश्वास व्यक्त गरेका छन्।

“आईसीसीको मान्यताले एनपीएलमा आबद्ध खेलाडीहरूलाई अन्तर्राष्ट्रिय स्तरको अनुभव मिल्नेछ भने क्लबहरूलाई थप अनुशासित, जिम्मेवार र अन्तर्राष्ट्रिय मापदण्डतर्फ प्रेरित गर्न यो निर्णय कोसेढुङ्गा साबित हुनेछ”, वक्तव्यमा भनिएको छ।

घिमिरेले आईसीसीको मान्यतालाई खेलाडी र व्यवस्थापकका साथै लगानीकर्ता तथा निजी क्षेत्रका लागि पनि महत्त्वपूर्ण उपलब्धि मानेका छन्। यसले विभिन्न प्रदेशका खेलाडीलाई आफ्नो क्षमता र प्रतिभा प्रदर्शन गर्न थप हौसला मिल्ने तथा नेपाली क्रिकेटको भविष्यलाई नयाँ दिशा दिने उनको विश्वास छ।

यसअघि अन्तर्राष्ट्रिय टेस्ट राष्ट्रका खेलाडी भित्र्याउन निश्चित कोटा र गोलाप्रथा प्रणालीका कारण टोलीले चाहेका खेलाडी अनुबन्ध गर्न कठिनाइ हुने गरेको वक्तव्यमा उल्लेख छ। अब उक्त सीमितता हट्ने र टोलीले आफूले चाहेका उत्कृष्ट टेस्ट खेलाडी भित्र्याउन सक्ने कर्णाली याक्सको विश्वास छ। यसले क्लबहरूबीच स्वस्थ प्रतिस्पर्धा बढाउने पनि वक्तव्यमा जनाइएको छ।

नेपाली राष्ट्रिय टोलीले अन्तर्राष्ट्रिय प्रतियोगितामा सहभागिता जनाउँदै आएकोमा एनपीएलजस्ता लिगमार्फत पनि नेपाली क्रिकेट अन्तर्राष्ट्रिय बजारमा पुग्ने अवसर बढ्ने कर्णाली याक्सले जनाएको छ। यसबाट खेल पर्यटन प्रवर्द्धन हुनुका साथै नेपालको क्रिकेटले नयाँ उचाइ हासिल गर्ने क्लबको अपेक्षा छ।