यमनमा हुथी विद्रोहीको आक्रमणमा २० सैनिकको मृत्यु

काठमाडौँ । यमनको दक्षिणी प्रान्त शबवामा हुथी विद्रोहीले सरकारी सेनाको सैन्य शिविरमा गरेको क्षेप्यास्त्र आक्रमणमा कम्तीमा २० सैनिकको मृत्यु भएको छ। आक्रमणमा दुई दर्जनभन्दा बढी सैनिक घाइते भएका छन्। 

Watch On

यमनी सेनाका अधिकारीहरूका अनुसार इरान समर्थित हुथी विद्रोहीले सोमबार शबवास्थित अल–आलम सैन्य शिविरलाई लक्षित गरी ब्यालेस्टिक क्षेप्यास्त्र प्रहार गरेका थिए। अन्तर्राष्ट्रिय रूपमा मान्यता प्राप्त यमनी सरकारका ती अधिकारीले सञ्चारमाध्यमलाई आधिकारिक रूपमा जानकारी दिने अनुमति नपाएकाले नाम गोप्य राख्ने सर्तमा घटनाबारे बताएका हुन्। 

पछिल्ला महिनामा यमनमा बढ्दै गएको हिंसात्मक घटनामध्ये यो एक घातक आक्रमण हो। इरान र अमेरिकाबीचको व्यापक द्वन्द्वसँगै क्षेत्रीय तनाव बढेपछि यमनमा पनि सरकारी सेना र हुथी विद्रोहीबीचको लडाइँ तीव्र बनेको छ।

हुथी विद्रोही र साउदी अरब समर्थित सरकारी सेनाबीचको बढ्दो तनावले सन् २०२२ मा भएको युद्धविरामलाई कमजोर बनाएको छ। उक्त युद्धविरामले यमनको गृहयुद्धमा जारी लडाइँलाई धेरै हदसम्म नियन्त्रणमा राख्न मद्दत गरेको थियो। 

यसैबीच, हुथी विद्रोहीद्वारा सञ्चालित स्वास्थ्य मन्त्रालयका अनुसार आइतबार साउदी नेतृत्वको गठबन्धनले गरेको भनिएको हवाई आक्रमणमा यमनको उत्तरी प्रान्त सादामा कम्तीमा नौ जनाको मृत्यु भएको छ। मृतकमा पाँच बालबालिका र दुई महिला छन्।

हुथी विद्रोहीका अनुसार सप्ताहान्तमा भएका अन्य आक्रमणमा पनि ३० जनाभन्दा बढीको मृत्यु भएको वा उनीहरू घाइते भएका छन्। यी घटनाबारे साउदी अरबले तत्काल कुनै प्रतिक्रिया दिएको छैन।