समाज

एनपीएलमा पहिलोपटक डीआरएस प्रयोग हुने

सिधाकुरा

मंगलबार, कात्तिक ३, २०८३

काठमाडौं। नेपाल प्रिमियर लिग (एनपीएल) को तेस्रो संस्करणमा पहिलोपटक डिसिजन रिभ्यू सिस्टम (डीआरएस) प्रयोग हुने भएको छ। सिद्धार्थ बैंकको सहयोगमा प्रतियोगितामा डीआरएस भित्र्याउन लागिएको नेपाल प्रिमियर लिगले जनाएको छ।

Watch On

नेपाल क्रिकेट संघ (क्यान) ले मंगलबार सामाजिक सञ्जालमार्फत यसपटकको एनपीएलमा डीआरएस प्रयोग हुने जानकारी दिएको हो।

क्यानका सचिव पारस खड्काले यसअघि नै एनपीएलमा पहिलोपटक डीआरएस ल्याउने पहल भइरहेको बताएका थिए। त्यसका लागि दुई कम्पनीसँग प्रविधिको परीक्षण गरिएको थियो। परीक्षणपछि प्रविधिको तथ्यपरकता मूल्यांकन गरेर अन्तिम निर्णय लिइने उनले बताएका थिए।

डीआरएस क्रिकेटमा अम्पायरको निर्णय पुनरावलोकन गर्न प्रयोग गरिने प्रविधि हो। अम्पायरको निर्णयमा असहमति भएमा खेलाडीले नियमअनुसार रिभ्यू माग गर्न सक्छन्। यसले खेलमा अम्पायरको निर्णयको शुद्धता बढाउन सहयोग गर्छ।

क्यानका अनुसार एनपीएलमा एलबीडब्लूको निर्णय पुनरावलोकन गर्न थ्रीडी बल ट्र्याकिङ प्रविधि प्रयोग हुनेछ। त्यस्तै, रनआउट र स्टम्पिङका निर्णय पनि रिभ्यू गर्न सकिनेछ।

डीआरएसको प्रयोगले एनपीएलमा निर्णय प्रक्रियालाई थप प्रविधिमैत्री बनाउने र खेलको निष्पक्षता बढाउन सहयोग गर्ने अपेक्षा गरिएको छ।

प्रकाशित मिति: मंगलबार, कात्तिक ३, २०८३

प्रतिक्रिया दिनुहोस्