ब्रह्मायणी जात्रामा बिहानैदेखि भक्तजनको भीड

भक्तपुर। भक्तपुरको ब्रह्मायणी मन्दिरमा विजयादशमीका अवसरमा लाग्ने ब्रह्मायणी जात्रामा रातिदेखि नै भक्तजनको भीड लागेको छ । नवदुर्गाको शक्तिपीठका रूपमा मानिने ब्रह्मायणी मन्दिरमा त्रिपुरा सुन्दरी प्रकट हुने जनविश्वासका साथ प्रत्येक वर्ष विजयादशमीका दिन भव्य मेला लाग्ने परम्परा छ ।

Watch On

भक्तपुरवासी धिमेबाजा बजाउँदै मध्यरातिदेखि नै ब्रह्मायणी मन्दिर पुगेर जात्रामा सहभागी भएका छन् । व्रत बसेका भक्तजन घरदेखि मन्दिरसम्म घस्रिँदै, पल्टिँदै तथा शरीरमा पाँच, सात र १८ वटा दियो बालेर पुग्ने र पूजा गर्ने परम्परा छ । यसरी शरीरमा बत्ती बाल्ने र शरीर नाप्दै मन्दिरसम्म पुग्ने चलनले मनोकाङ्क्षा पूरा हुने तथा धर्म प्राप्त हुने जनविश्वास छ ।

नवदुर्गा प्रकट हुने धार्मिक विश्वासका कारण मन्दिरमा दिनभरि नै मेला लाग्ने गर्दछ । नेवार समुदायमा विजयादशमीका दिन मोहिनी नखः मनाउँदै घरघरमा कालो टीका लगाएपछि प्रत्येक घरबाट पूजासामग्री लिएर ब्रह्मायणी मन्दिर जानुपर्ने परम्परा छ ।

जात्रामा भक्तपुर, मध्यपुरथिमि, ताथली, सुडाल, बागीश्वरी, चित्तपोल, सिपाडोल, नङ्खेल र गुण्डुललगायतका स्थानका साथै काभ्रे, ललितपुर र काठमाडौँबाट समेत भक्तजन आउने गरेका छन् । मन्दिरमा जमरा, हाँसको फूल, हाँस, बोका र कुखुराको भालेको बलि दिने चलन छ ।

गाँठेमङ्गलका दिन नवदुर्गा मन्दिरमा ल्याएर पालिएको महिषासुर दैत्यको प्रतीक खःमेय अर्थात् राँगोलाई मङ्गलबार साँझ ब्रह्मायणी जात्राका क्रममा बध गरिएको थियो । नवदुर्गा मन्दिरबाट जाँड खुवाएर मत्ताइएको राँगोलाई अबिर र तेल दलेर दौडाउँदै तथा लखेट्दै ब्रह्मायणी मन्दिर पुर्‍याई बध गरेपछि जात्रा सुरु भएको हो ।