ताकमकोतको ठेलो प्रतियोगितामा अशोकको ११औँ जित

म्याग्दी । म्याग्दीको धौलागिरि गाउँपालिका–७ स्थित ऐतिहासिक ताकमकोतमा बडादसैँको महानवमीका अवसरमा आयोजित परम्परागत ठेलो फाल्ने प्रतियोगितामा अशोक खत्रीले ११औँ पटक उपाधि जितेका छन् ।

Watch On

धौलागिरि गाउँपालिका–७ का वडाध्यक्षसमेत रहेका खत्रीले २२ जना प्रतिस्पर्धीलाई पछि पार्दै उपाधि जितेका हुन् । आठ दशमलव पाँच किलोग्राम तौलको फलामको ठेलो सबैभन्दा टाढा फालेपछि उनलाई ‘माल’ घोषणा गरिएको कोतपूजा व्यवस्थापन समितिका सदस्य दिनेश केसीले जानकारी दिए ।

केसीका अनुसार खत्रीबाहेक हालसम्म अन्य कसैले पनि ताकमकोतको ठेलो प्रतियोगितामा ११ पटक उपाधि जितेका छैनन् ।

खत्रीले विसं २०७१ देखि २०७७ सम्म लगातार सात पटक उपाधि जितेका थिए । विसं २०७८ मा प्रतियोगितामा सहभागी नभएका उनी २०७९ मा मालिका गाउँपालिका–१ निस्कोटका याम परियारसँग पराजित भएका थिए । त्यसपछि विसं २०८० देखि यस वर्षसम्म लगातार विजयी हुँदै उनले ११औँ उपाधि हात पारेका हुन् ।

निरन्तरको अभ्यास, शारीरिक व्यायाम र स्वच्छ खानपानले उपाधि जित्न सहयोग गरेको खत्रीले बताए ।

उपाधि जितेपछि उनलाई धौलागिरि गाउँपालिकाका अध्यक्ष प्रेमप्रसाद पुनलगायतले फेटा गुथाएर सम्मान गरेका थिए । स्थानीयवासीले खत्रीलाई काँधमा बोकेर बाजागाजासहित ताकमकोत परिक्रमा गराएका थिए । प्रतियोगितामा विजयी हुनेलाई फेटा गुथाएर काँधमा बोकी गाउँ परिक्रमा गराउने र नगद पुरस्कार दिने परम्परा छ ।

गाउँपालिका अध्यक्ष पुनका अनुसार ताकमकोतमा ठेलो फालेर ‘माल’ अर्थात् पहलमानको सम्मान पाउनु यस क्षेत्रका बलिया युवाहरूका लागि पुस्तौँदेखिको गौरव र प्रतिष्ठाको विषय हो ।

ऐतिहासिक विवरणअनुसार विसं १२४६ देखि १५४५ सम्म बगाले थापा र विसं १५४६ देखि १८८२ सम्म मल्ल राजाले ताकमकोतबाट राज्य सञ्चालन गरेका थिए । बाइसे–चौबिसे राज्यका पालामा करिब आठ सय वर्षअघि महानवमीका अवसरमा ठेलो फालेर पहलमान पहिचान गर्ने चलन सुरु भएको स्थानीय परम्परामा उल्लेख छ । त्यही परम्परालाई अहिले पनि निरन्तरता दिइँदै आएको छ ।