प्रधानमन्त्री बालेनको शुभकामना : भ्रष्टाचार र कुशासन हटाउन एकजुट होऔं

काठमाडौँ । प्रधानमन्त्री बालेन शाहले भ्रष्टाचार, कुशासन, ढिलासुस्ती, असमानता र राजनीतिक विकृति हटाउन सबै एकजुट हुनुपर्ने बताएका छन् ।

Watch On

विजयादशमीका अवसरमा बुधबार सामाजिक सञ्जालमार्फत शुभकामना सन्देश जारी गर्दै उनले हरेक नागरिकलाई सरकार आफ्ना लागि छ भन्ने महसुस गराउन आवश्यक रहेको बताएका हुन् ।

विजयादशमीले मानिसमा रहेका अहङ्कार, लोभ, ईर्ष्या, हिंसा र विभेदजस्ता नकारात्मक सोच त्याग्न प्रेरणा दिने उल्लेख गर्दै बालेनले यस्ता विकृति हटाउन इमानदार प्रयास, अठोट र सामूहिक मेहनत आवश्यक रहेको बताएका छन् ।

‘परिवर्तनका लागि सोचसँगै व्यवहार पनि बदल्न जरुरी छ,’ उनले शुभकामना सन्देशमा भनेका छन् ।

प्रधानमन्त्री बालेनले विजयादशमीलाई असत्यमाथि सत्यको विजयको उत्सवका रूपमा व्याख्या गरेका छन् । पौराणिक मान्यताअनुसार यसै दिन दुर्गा भवानीले महिषासुरमाथि र भगवान् रामले रावणमाथि विजय प्राप्त गरेको प्रसङ्ग उल्लेख गर्दै उनले स्वदेश तथा विदेशमा रहेका नेपालीलाई सुख, शान्ति, समृद्धि र उत्तरोत्तर प्रगतिको शुभकामना दिएका छन् ।

विजयादशमीका अवसरमा मान्यजनबाट टीका, जमरा र आशीर्वाद ग्रहण गर्ने परम्पराले सत्कर्ममा विजय प्राप्त गर्ने प्रेरणा दिने उनको भनाइ छ । टाढा रहेका मान्यजनलाई समेत खोजीखोजी भेट्न जाने परम्पराले पारिवारिक आत्मीयता बढाउने उनले उल्लेख गरेका छन् ।

विविध भौगोलिक, सांस्कृतिक र भाषिक पहिचान भएको नेपाली समाजमा विजयादशमीले सबै वर्ग, समुदाय र क्षेत्रका नागरिकलाई एकताबद्ध गर्न तथा वर्षौँदेखि छुट्टिएका साथीभाइ र आफन्तसँग आत्मीयता साट्ने अवसर प्रदान गर्ने उनले बताएका छन् ।

अन्त्यमा उनले सबैलाई आआफ्नो क्षमता र अवस्थाअनुसार विजयादशमी मनाउन तथा आपसमा सद्भाव, एकता, सम्मान र माया साटासाट गर्न आह्वान गरेका छन् ।