कास्कीमा असोजमा ३२ फरार प्रतिवादी पक्राउ

कास्की । जिल्ला प्रहरी कार्यालय कास्कीले गत असोज महिनामा विभिन्न मुद्दामा अदालतबाट दोषी ठहर भई फरार रहेका ३२ जना प्रतिवादीलाई पक्राउ गरेको छ ।

Watch On

पक्राउ पर्नेमा २३ पुरुष र नौ महिला छन् । उनीहरूबाट १२ वर्ष छ महिना आठ दिन कैद सजाय तथा १६ लाख ६६ हजार ९७२ रुपैयाँ जरिवाना असुलउपर गर्नुपर्ने देखिएको जिल्ला प्रहरी कार्यालय कास्कीले जनाएको छ ।

कार्यालयका सूचना अधिकारी एवं प्रहरी नायब उपरीक्षक वीरेन्द्रकुमार पासवानका अनुसार पक्राउ परेका प्रतिवादीलाई कैद सजाय भुक्तान गराउन तथा जरिवाना असुल गर्न अदालतमा बुझाइएको छ ।

चेक अनादर, बिगो लेनदेन, बैङ्किङ कसुर, सवारी ज्यान र अभद्र व्यवहारलगायत मुद्दामा अदालतबाट दोषी ठहर भई सजाय भुक्तान नगरेका प्रतिवादीलाई पक्राउ गरिएको प्रहरीले जनाएको छ ।

प्रहरीले पछिल्लो समय फरार प्रतिवादीलाई कानुनी दायरामा ल्याउन सक्रियता बढाएको छ । गत भदौ महिनामा कास्कीमा ५६ जना फरार प्रतिवादी पक्राउ परेका थिए । असोज महिनामा चालु मुद्दाका क्रममा ११२ जनालाई पक्राउ गरिएको कार्यालयले जनाएको छ ।

कार्यालयका अनुसार असोजमा अपराधसँग सम्बन्धित १५९ वटा मुद्दा दर्ता भएका छन् । तीमध्ये जघन्य तथा गम्भीर अपराधका २५, महिला, बालबालिका तथा ज्येष्ठ नागरिकसँग सम्बन्धित सात, आर्थिक अपराधका २४ र अन्य अपराधका १०३ मुद्दा छन् ।

सोही अवधिमा सामाजिक हिंसासम्बन्धी ६९ वटा ठाडो उजुरी परेको प्रहरीले जनाएको छ ।