शिक्षा तथा खेलकुद मन्त्री पोखरेल र अमेरिकी कार्यवाहक राजदूतबीच के भयो कुराकानी?

काठमाडौं । शिक्षा तथा खेलकुद मन्त्री सस्मित पोखरेल र नेपालका लागि अमेरिकी कार्यवाहक राजदूत मेगन बोल्डिनबीच शिक्षा क्षेत्रमा द्विपक्षीय सहकार्य र खेलकुद कूटनीतिबारे छलफल भएको छ।

Watch On

शुक्रबार शिक्षा तथा खेलकुद मन्त्रालयमा भएको भेटमा दुई देशबीचको शैक्षिक सहकार्य विस्तार, विद्यार्थी तथा प्राध्यापक आदानप्रदान र खेलाडी तथा प्रशिक्षकको क्षमता विकासका विषयमा कुराकानी भएको हो।

भेटमा कार्यवाहक राजदूत बोल्डिनले हालैको भोटेकोशी बाढीबाट भएको क्षतिप्रति दुःख व्यक्त गर्दै नेपालको कठिन परिस्थितिमा अमेरिका साथमा रहने बताइन्। उनले नेपालको विकासमा अमेरिकी सहयोग निरन्तर रहने प्रतिबद्धता पनि व्यक्त गरेको उनको सचिवालयले जानकारी दिएको छर।

मन्त्री पोखरेलले शिक्षा क्षेत्रमा अमेरिकाले लामो समयदेखि गर्दै आएको सहयोगप्रति धन्यवाद दिँदै आगामी दिनमा सहकार्य थप विस्तार गर्नुपर्ने बताए। अमेरिकी सहयोगमा सञ्चालित नेसनल अर्ली ग्रेड रिडिङ प्रोग्राम र नेसनल अर्ली ग्रेड लर्निङ प्रोग्रामले नेपालको आधारभूत शिक्षा सुधारमा योगदान पुर्‍याएको उनको भनाइ थियो।

उनले विद्यार्थी, विश्वविद्यालयका प्राध्यापक तथा शिक्षकको आदानप्रदान कार्यक्रमलाई प्राथमिकता दिनुपर्नेमा जोड दिए। भेटमा अमेरिकी सहयोगमा सञ्चालित फुलब्राइट छात्रवृत्तिलगायत कार्यक्रमलाई निरन्तरता दिने विषयमा पनि छलफल भएको सचिवालयको भनाइ छ।

त्यस्तै, सन् २०२८ मा अमेरिकाको लस एन्जलसमा आयोजना हुने ओलम्पिक तथा प्याराओलम्पिक खेललाई लक्षित गरी खेलकुद क्षेत्रमा सहकार्य गर्ने विषयमा पनि कुराकानी भएको छ।

अमेरिकी विशेषज्ञताको उपयोग गर्दै नेपाली खेलाडी तथा प्रशिक्षकलाई तालिम, खेलाडी विकास र खेल व्यवस्थापनसम्बन्धी सीप उपलब्ध गराउने सम्भावनाबारे छलफल भएको मन्त्रालयले जनाएको छ।

कार्यवाहक राजदूत बोल्डिनले खेलकुद क्षेत्रमा अमेरिकी अनुभव र सीप नेपालका लागि उपयोगी हुन सक्ने बताइन्। मन्त्री पोखरेलले पनि यस क्षेत्रमा सहकार्य विस्तार गर्न सकिने सम्भावना औँल्याए।

भेटमा दुवै पक्षले शिक्षा र खेलकुद क्षेत्रमा विद्यमान सहकार्यलाई थप सुदृढ बनाउँदै विद्यार्थी तथा शिक्षक आदानप्रदानलगायत कार्यक्रमलाई प्राथमिकता दिने प्रतिबद्धता व्यक्त गरेका छन्।