समाज

डिजेल ट्यांकर, हाइस र मोटरसाइकल ठाेक्किँदा १० जना घाइते

सिधाकुरा

शुक्रबार, कात्तिक १३, २०८३

डिजेल ट्यांकर, हाइस र मोटरसाइकल ठाेक्किँदा १० जना घाइते

बारा । बाराको जितपुरसिमरा उपमहानगरपालिका–२१ स्थित हेटौँडा–पथलैया सडकखण्डमा डिजेल बोकेको ट्यांकर, हाइस र मोटरसाइकल एकआपसमा ठोक्किँदा १० जना घाइते भएका छन्।

Watch On

नेपाल आयल निगमको अमलेखगन्ज डिपो नजिक बिहीबार दिउँसो करिब १२ बजे दुर्घटना भएको प्रहरीले जानकारी दिएको छ।

प्रहरीका अनुसार अमलेखगन्जबाट जनकपुरतर्फ जाँदै गरेको ना.४ ख २३४९ नम्बरको डिजेल बोकेको ट्यांकरमा वीरगन्जबाट हेटौँडातर्फ आउँदै गरेको ग.२ ख १९९३ नम्बरको हाइस ठोक्किएको थियो। त्यसपछि हाइसको पछाडि धरानबाट हेटौँडातर्फ आउँदै गरेको अनटेस्ट मोटरसाइकल ठोक्किएको प्रहरीले जनाएको छ।

दुर्घटनामा ट्यांकर चालक, हाइस चालक, मोटरसाइकल चालक र हाइसमा सवार यात्रु गरी १० जना घाइते भएका छन्। घाइतेमध्ये दुई चालकसहित सबैको अवस्था सामान्य रहेको छ।

घाइतेहरूको अमलेखगन्जस्थित स्थानीय अक्कलबहादुर कार्की मेडिकल तथा नोभाकेयरमा उपचार भइरहेको छ।

दुर्घटनापछि अवरुद्ध सडक एकतर्फी सञ्चालन गरिएको थियो। दिउँसो १ः५५ बजेदेखि भने दुईतर्फी यातायात सञ्चालनमा आएको प्रहरीले जनाएको छ।

दुर्घटनामा संलग्न तीनवटै सवारीसाधन प्रहरीले नियन्त्रणमा लिएर इलाका प्रहरी कार्यालय अमलेखगन्जमा राखेको छ। घटनाबारे थप अनुसन्धान भइरहेको छ।

प्रकाशित मिति: शुक्रबार, कात्तिक १३, २०८३

प्रतिक्रिया दिनुहोस्