अष्ट्रेलियाका अलराउन्डर ग्लेन म्याक्सवेलले लिए अन्तर्राष्ट्रिय क्रिकेटबाट सन्यास

सिड्नी । अष्ट्रेलियाका विस्फोटक अलराउन्डर ग्लेन म्याक्सवेलले अन्तर्राष्ट्रिय क्रिकेटबाट सन्यासको घोषणा गरेका छन् । ३८ वर्षीय म्याक्सवेलले सोमबार आधिकारिक रूपमा आफ्नो १४ वर्ष लामो अन्तर्राष्ट्रिय करियरमा पूर्णविराम लगाएका हुन् ।

Watch On

प्रसिद्ध पोडकास्ट 'द फाइनल वर्ड' मा कुरा गर्दै उनले आफ्नो सन्यासको निर्णय बारे जानकारी गराएका छन् । उनले सन् २०२६ को टी-२० विश्वकपपछि नै टिम व्यवस्थापनसँग भविष्यको योजनाबारे छलफल चलिरहेको बताए । सन्यासको घोषणा गर्दै उनले भने, 'म मेरो देशको प्रतिनिधित्व गर्न पाउनुलाई ठूलो सौभाग्य मान्छु र यस दौरान मिलेको समयका लागि अत्यधिक आभारी छु ।'

गत वर्ष जुन २०२५ मै एकदिवसीय क्रिकेटलाई अलविदा भनिसकेका म्याक्सवेल त्यसयता अष्ट्रेलियाका लागि केवल टी-२० फर्मेटमा मात्रै खेल्दै आएका थिए । यस वर्षको सुरुआतमै सम्पन्न टी-२० विश्वकपको दौरान ओमानविरुद्ध खेलिएको म्याच नै उनको अन्तर्राष्ट्रिय करियरको अन्तिम खेल बन्न पुग्यो, जसमा उनले बलिङतर्फ दुई विकेट हात पारेका थिए ।

म्याक्सवेलको करियर

म्याक्सवेलले अष्ट्रेलियाका लागि ७ टेस्ट, १४९ एकदिवसीय र १३० टी-२० अन्तर्राष्ट्रिय खेल खेलेका छन् । आफ्नो १४ वर्षको लामो करियरमा उनले कुल १० अन्तर्राष्ट्रिय शतक र १३६ विकेट आफ्नो नाममा लेखाए ।

मैदानको चारै दिशामा शट खेल्ने क्षमताका कारण 'द बिग शो' उपनामले चिनिने म्याक्सवेलले सन् २०२३ को एकदिवसीय विश्वकपमा अफगानिस्तानविरुद्ध शारीरिक पीडा (क्राम्प) का बाबजुद प्रहार गरेको २०१ रनको ऐतिहासिक अविजित पारीलाई क्रिकेट इतिहासकै उत्कृष्ट पारी मानिन्छ ।

अन्तर्राष्ट्रिय क्रिकेटबाट बाहिरिए पनि म्याक्सवेलले विश्वभरका फ्रेन्चाइज टी-२० लिगहरूमा भने आफ्नो खेल प्रस्तुति निरन्तर राख्नेछन् ।