उदयपुरमा ३८ परिवारले पाए लालपुर्जा, अरू पालिकामा पनि वितरणको तयारी

उदयपुर । वर्षौंदेखि आफूले भोगचलन गर्दै आएको जग्गाको कानुनी स्वामित्वबाट वञ्चित उदयपुरका भूमिहीन तथा अव्यवस्थित बसोबासीले लालपुर्जा पाउन थालेका छन्। यसैक्रममा त्रियुगा नगरपालिकाका ३८ परिवारले जग्गाधनी पुर्जा प्राप्त गरेका छन्।

Watch On

जिल्ला भूमि आयोग उदयपुरमार्फत आवश्यक कानुनी प्रक्रिया पूरा गरेका त्रियुगा नगरपालिका–३ र ५ का भूमिहीन दलित, भूमिहीन सुकुम्बासी तथा अव्यवस्थित बसोबासी परिवारलाई बिहीबार लालपुर्जा वितरण गरिएको हो।

नगरप्रमुख वसन्तकुमार बस्नेतका अनुसार वडा नम्बर ३ का ११ र वडा नम्बर ५ का २७ परिवारले जग्गाधनी पुर्जा पाएका छन्। आवश्यक कानुनी प्रक्रिया पूरा गरेका परिवारलाई प्राथमिकताका आधारमा पुर्जा वितरण गरिएको उनले बताए।

‘भूमिहीन दलित, भूमिहीन सुकुम्बासी र अव्यवस्थित बसोबासीलाई लालपुर्जा दिएका छौँ। बाँकी वडामा पनि प्रक्रिया पूरा भएपछि वितरण गर्दै जानेछौँ,’ बस्नेतले भने।

लालपुर्जा पाएसँगै वर्षौंदेखि आफूले उपभोग गर्दै आएको जग्गाको कानुनी स्वामित्व नपाएका परिवारले पहिलोपटक आफ्नो बसोबास रहेको जग्गामाथि औपचारिक अधिकार पाएका छन्।

जिल्ला भूमि आयोग उदयपुरका अध्यक्ष एवं प्रमुख जिल्ला अधिकारी कृष्णबहादुर शाहीका अनुसार जिल्लाका अन्य स्थानीय तहमा पनि जग्गाधनी पुर्जा वितरणको प्रक्रिया अघि बढेको छ। भूमिहीन दलित, सुकुम्बासी तथा अव्यवस्थित बसोबासीको समस्या समाधान गरी उनीहरूलाई जग्गाको कानुनी स्वामित्व प्रदान गर्ने उद्देश्यले काम भइरहेको उनले बताए।

शाहीका अनुसार लालपुर्जा वितरणअघि सम्बन्धित स्थानीय तहले जग्गाको नापजाँच गरी आवश्यक कागजात तयार पार्नुपर्छ। स्थानीय तहबाट प्राप्त कागजातको आयोगले अध्ययन तथा कानुनी परीक्षण गरेपछि अन्तिम स्वीकृतिका आधारमा पुर्जा वितरण गरिन्छ।

‘स्थानीय तहले नापजाँच गरेर तयार पारेका कागजातका आधारमा आयोगले आवश्यक अध्ययन र कानुनी प्रक्रिया पूरा गरी जग्गाधनी पुर्जा वितरण गर्छ,’ उनले भने।

आयोगका अनुसार शुक्रबार कटारी नगरपालिकाका ११ परिवारलाई जग्गाधनी पुर्जा वितरण गर्ने तयारी छ। त्यस्तै, रौतामाई गाउँपालिका–७ का ६५ परिवारको पुर्जा तयार भइसकेको छ।

चौदण्डीगढी नगरपालिकाका ३२ र बेलका नगरपालिकाका ४५ परिवारका लागि पनि जग्गाधनी पुर्जा वितरण गर्न आवश्यक तयारी पूरा भएको शाहीले जानकारी दिए।

‘पुर्जा तयार भएका स्थानीय तहलाई वितरण प्रक्रिया अघि बढाउन भनेका छौँ। अन्य पालिकाबाट प्राप्त भएका कानुनी प्रक्रिया पूरा गरेका कागजातको पनि अध्ययन भइरहेको छ,’ उनले भने।

जिल्लाका विभिन्न स्थानीय तहमा पुर्जा वितरणको तयारी भइरहे पनि सबै भूमिहीन तथा अव्यवस्थित बसोबासीले जग्गाको स्वामित्व प्राप्त गर्न नापजाँच, कागजात प्रमाणीकरण र आवश्यक कानुनी प्रक्रिया पूरा गर्नुपर्ने आयोगले जनाएको छ।