नरक चतुर्दशीमा बिहानै स्नान र यमदीप दान

काठमाडौं । कार्तिक कृष्ण चतुर्दशीका अवसरमा आज बिहान नरक स्नान गरी यमदीप बगाएर नरक चतुर्दशी पर्व मनाइएको छ । वैदिक सनातन हिन्दू धर्मावलम्बीले अरुणोदयकालअघि नदी, तलाउ, कुवा, पोखरी तथा धारामा स्नान गरी सालको पातमा दक्षिण दिशातर्फ फर्काएर यमदीप बाल्दै बगाएका छन् ।

Watch On

धर्मशास्त्रअनुसार आजका दिन नरक स्नान गरी यमदीप बगाएमा नरकको दर्शन गर्नु नपर्ने धार्मिक विश्वास छ । यसलाई नरक स्नान गर्ने र नरक बगाउने भनिने धर्मशास्त्रविद् प्रा. तोयराज नेपालले जानकारी दिए । बोलीचालीको भाषामा यसलाई ‘नरके नुहाएर बगाउने’ पनि भनिन्छ ।

आजै कुकुर तिहार पनि मनाइँदै छ । कुकुरलाई यमराजको दूतका रूपमा पूजा गरी मीठा परिकार खान दिने परम्परा छ । साँझ औँसी तिथि लाग्ने भएकाले धनधान्यकी देवी लक्ष्मीको पूजा आराधना पनि गरिँदै छ ।

नेपाल पञ्चाङ्ग निर्णायक विकास समितिका अध्यक्ष प्रा. डा. पुरुषोत्तम भट्टराईका अनुसार तिथिको घटबढका कारण यस वर्ष नरक चतुर्दशी र कुकुर तिहार एकै दिन परेका हुन् । अरुणोदयकालअघि चतुर्दशी तिथि परेका दिन नरक स्नान गरी दीपदान गर्नुपर्ने शास्त्रीय मान्यताअनुसार आज बिहान नरक चतुर्दशी मनाउने निर्णय गरिएको उनले बताए ।

यस वर्ष कात्तिक २० गते शुक्रबारदेखि यमपञ्चक अर्थात् तिहार सुरु भएको हो । दोस्रो दिन शनिबार काग तिहार र धन्वन्तरि जयन्ती मनाइएको थियो ।

उज्यालोको पर्वका रूपमा परिचित तिहारसँगै सहर तथा बजार झिलिमिली बनेका छन् । घर, आँगन र सार्वजनिक स्थलमा दीपमालिका सजाएर सर्वसाधारणले पर्वको उल्लास मनाइरहेका छन् ।