जलवायुजन्य विपद्पछि नेपाललाई विशेष वित्तीय प्याकेज आवश्यकः अर्थमन्त्री वाग्ले

अन्ताल्या (टर्किए) । अर्थमन्त्री डा स्वर्णिम वाग्लेले जलवायुजन्य विपद्पछिको पुनर्निर्माण र आर्थिक पुनरुत्थानका लागि नेपालजस्ता जोखिममा रहेका मुलुकलाई विशेष अन्तरराष्ट्रिय वित्तीय प्याकेज आवश्यक रहेको बताएका छन् ।

Watch On

संयुक्त राष्ट्रसङ्घीय जलवायु परिवर्तनसम्बन्धी पक्ष राष्ट्रहरूको ३१औँ सम्मेलन (कोप–३१) अन्तर्गत आज नेपाल पेभिलियनमा आयोजित छलफलमा उनले अनुदान, सहुलियतपूर्ण ऋण र ऋण राहत समेटिएको वित्तीय सहयोगको आवश्यकता औँल्याएका हुन् ।

‘जलवायुजन्य विपद्को आर्थिक भार नेपालले एक्लै धान्न सक्दैन,’ उनले भने ।

‘विपद्को पूर्ण आर्थिक भारः जलवायुजन्य आघातपछि ऋण, ऋण मूल्याङ्कन तथा मुद्राको अवस्था र आवश्यक सहयोग प्याकेजको स्वरूप’ विषयक छलफलमा अर्थमन्त्री वाग्लेले विपद्पछिको उद्धार, राहत र पुनर्निर्माणका लागि सरकारले अन्य विकास तथा सामाजिक क्षेत्रको बजेट कटौती गर्नुपरेको बताए ।

यसले विद्यालय तथा अस्पताल निर्माण, सामाजिक सुरक्षा र विकासका अन्य कार्यक्रममा प्रत्यक्ष असर परेको उनको भनाइ थियो ।

उनले विपद्का बेला भारत, चीन, बेलायत, अमेरिका, युरोपेली सङ्घ तथा मध्यपूर्व र खाडी क्षेत्रका मुलुकले उपलब्ध गराएको सहयोगप्रति आभार व्यक्त गरे ।

जलवायुजन्य क्षति तथा हानिनोक्सानी कोषबाट नेपालले पहिलोपटक करिब दुई करोड अमेरिकी डलर अनुदान प्राप्त गरेको उल्लेख गर्दै उनले उक्त सहयोग स्वागतयोग्य भए पनि जोखिममा रहेका मुलुकको आवश्यकताका तुलनामा कोषको स्रोत अपर्याप्त रहेको बताए ।

नेपालको करिब ५० प्रतिशत भूभाग वनले ढाकेको उल्लेख गर्दै उनले जलवायु परिवर्तनको असर र विपद्को आर्थिक भार सम्बोधन गर्न अन्तरराष्ट्रिय सहयोग थप प्रभावकारी र पर्याप्त हुनुपर्नेमा जोड दिए ।