इरानी धम्कीपछि अमेरिकी अर्थमन्त्री बेसेन्ट सैन्य बेसमा

वासिङ्टन । इरानबाट ज्यान मार्ने धम्की आएपछि अमेरिकी अर्थमन्त्री स्कट बेसेन्टले वासिङ्टनस्थित आफ्नो निवास छाडेर सैन्य बेसमा बसाइँ सरेका छन् ।

Watch On

द न्युयोर्क टाइम्सले मंगलबार घटनाबारे जानकार तीन स्रोतलाई उद्धृत गर्दै बेसेन्ट सैन्य बेसमा सरेको समाचार सार्वजनिक गरेको हो । रोयटर्सले पनि यस घटनाबारे जानकारी भएका दुई स्रोतलाई उद्धृत गर्दै समाचार पुष्टि गरेको छ ।

अमेरिकी अधिकारीहरूले इरानले वर्तमान तथा पूर्वअमेरिकी अधिकारीहरूलाई लक्षित गर्ने गतिविधि तीव्र बनाएको आकलन गरेका छन् । यद्यपि, बेसेन्टमाथि रहेको धम्कीको गम्भीरता र त्यससम्बन्धी विस्तृत विवरण सार्वजनिक गरिएको छैन ।

अमेरिकी राष्ट्रपति डोनाल्ड ट्रम्प प्रशासनमा अर्थमन्त्रीको जिम्मेवारी सम्हालिरहेका बेसेन्ट इरानमाथि आर्थिक दबाब बढाउने अमेरिकी अभियानका प्रमुख पात्र हुन् । गत अगस्टदेखि उनले इरानलाई आर्थिक रूपमा एक्ल्याउने र उसको वित्तीय स्रोत कमजोर बनाउने प्रतिबन्ध तथा आर्थिक दबाब अभियानको नेतृत्व गर्दै आएका छन् ।

यसैबीच, अमेरिकी राष्ट्रिय गुप्तचर निर्देशक जे क्लेटनले गत अक्टोबर २३ मा विदेशमन्त्री मार्को रुबियोलाई पठाएको सूचनामा इरानले अमेरिकी कर्मचारीलाई लक्षित गर्ने प्रयास उल्लेख्य रूपमा बढाएको बताएका थिए । उनले मध्यपूर्व र अन्य मुलुकमा अमेरिकी नागरिकविरुद्धका घातक आक्रमणका योजना उन्नत चरणमा पुगेको चेतावनी दिएका थिए ।

बेसेन्टलाई सैन्य बेसमा सारिएको घटनापछि अमेरिकी अर्थ मन्त्रालयका प्रवक्ताले इरानी सरकारको धम्कीबाट अर्थमन्त्री विचलित नहुने बताएका छन् । उनी इरानमाथि आर्थिक दबाब कायम राख्ने अभियानमा प्रतिबद्ध रहेको प्रवक्ताको भनाइ छ ।

रोयटर्सका अनुसार बेसेन्टको वासिङ्टनस्थित निवास पहिचान गर्न सकिने गरी वाल स्ट्रिट जर्नलले हवाई तस्बिर प्रकाशित गरेपछि उनको सुरक्षाबारे चिन्ता थपिएको थियो । त्यसपछि उनलाई सुरक्षित स्थानमा सारिएको स्रोतले बताएको छ ।

यसअघि पनि इरानबाट सम्भावित सुरक्षा खतरालाई ध्यानमा राख्दै अमेरिकाले मध्यपूर्वमा आफ्ना कूटनीतिक तथा सैन्य संरचनाको सुरक्षा व्यवस्था कडा पारेको थियो । गत अक्टोबरमा साउदी अरेबियास्थित अमेरिकी कूटनीतिक नियोगका अत्यावश्यकबाहेकका कर्मचारी र उनीहरूका परिवारलाई देश छाड्न निर्देशन दिइएको थियो ।

त्यस्तै, इरानबाट सम्भावित खतराको सूचनापछि बेलायतस्थित अमेरिकी सैन्य बेसबाट केही विमान अन्यत्र सारिएको समाचार पनि सार्वजनिक भएको थियो ।

इरानले अमेरिकी अधिकारीहरूलाई लक्षित गर्ने योजना बनाएको भन्ने आरोपबारे स्वतन्त्र रूपमा पुष्टि भएका विस्तृत प्रमाण सार्वजनिक भएका छैनन् । अमेरिकी अधिकारीहरूले भने इरानको विदेशमा आक्रमण गर्ने क्षमता सीमित रहेको आकलनसमेत गरेका छन् ।