गाडी दुर्घटनामा परेका अधिकांश एकै गाउँका, छठ मनाउन हिँडेका थिए

हेटौँडा । छठ पर्व मनाउन काठमाडौँबाट सर्लाहीस्थित एउटै गाउँ फर्किंदै गरेका यात्रु सवार इभी मकवानपुरको भीमफेदीमा दुर्घटना हुँदा १० जनाको मृत्यु भएको छ भने छ जना घाइते भएका छन् । दुर्घटनामा मृत्यु भएका चालकको पहिचान खुले पनि अन्य मृतकको पहिचान खुल्न बाँकी छ ।

Watch On

सर्लाहीको चक्रघट्टा गाउँका छिमेकी र आफन्तले काठमाडौँको टीकाथलीबाट गाडी रिजर्भ गरेर गाउँ फर्किने क्रममा दुर्घटना भएको हो ।

घाइतेमध्येका ३३ वर्षीय मुकेश यादवका अनुसार उनीहरू राति करिब २ बजे टीकाथलीबाट यात्रा सुरु गरेका थिए । गाडीमा चालकसहित करिब १४ जना सवार थिए । अधिकांश एउटै गाउँका छिमेकी तथा आफन्त थिए ।

बिहीबार बिहान करिब ५ः४५ बजे भीमफेदी गाउँपालिका–६ चिसापानीगढीस्थित भीमफेदी–कुलेखानी–काठमाडौँ सडकखण्डबाट गाडी करिब ५०० मिटर तल भिरमा खसेको थियो ।

दुर्घटनामा मृत्यु भएका चालक सर्लाहीको कविलासी नगरपालिका–८ का रविशङ्कर कुमार मण्डल रहेको जिल्ला प्रहरी कार्यालय मकवानपुरका प्रहरी नायब उपरीक्षक माधवप्रसाद काफ्लेले जानकारी दिए ।

उनका अनुसार दुर्घटनामा पाँच पुरुष, तीन महिला र दुई बालिकाको मृत्यु भएको छ । घाइते हुनेमा तीन पुरुष र तीन बालक रहेका छन् ।

हेटौँडा अस्पतालमा उपचाररत मुकेशको टाउको र ढाडमा चोट लागेको छ । घाइतेमध्ये मुकेशसहित सर्लाहीको चक्रघट्टा गाउँपालिका–४ का पाँच वर्षीय सक्षमकुमार यादव र तीन वर्षीय सुदन यादवको पहिचान खुलेको छ । सक्षमको अवस्था सामान्य र टाउको तथा मुखमा चोट लागेका सुदनको अवस्था मध्यम रहेको प्रहरीले जनाएको छ ।

घाइते छ जनाकै हेटौँडा अस्पतालमा उपचार भइरहेको छ ।

दुर्घटनामा परेको मधेस प्रदेश ०३–००१ ज ०८८० नम्बरको इभी सडकबाट करिब ५०० मिटर तल खसेको थियो ।

दुर्घटनास्थलमा नेपाल प्रहरी, सशस्त्र प्रहरी बल र नेपाली सेनाको टोली परिचालन गरी खोजतलास तथा उद्धार भइरहेको जिल्ला प्रहरी कार्यालय मकवानपुरका प्रमुख प्रहरी उपरीक्षक श्यामबहादुर खत्रीले बताए ।

दुर्घटनाको जानकारी बिहान ५ः५५ बजे प्राप्त भएपछि इलाका प्रहरी कार्यालय भीमफेदीबाट प्रहरी नायब निरीक्षक दीपेन्द्र ढकालको नेतृत्वमा सात जनाको टोली घटनास्थल पुगेको थियो । त्यसपछि प्रहरी उपरीक्षक खत्रीको नेतृत्वमा जिल्ला प्रहरी कार्यालयबाट थप टोली परिचालन गरिएको थियो ।

दुर्घटनास्थल इलाका प्रहरी कार्यालय भीमफेदीबाट करिब आठ किलोमिटर उत्तरमा पर्छ । भिरालो क्षेत्रमा गाडी खसेकाले सुरक्षाकर्मीले खोजतलास जारी राखेका छन् ।

मृतकको पहिचान खुलाउने र दुर्घटनाको कारण पत्ता लगाउने काम भइरहेको प्रहरीले जनाएको छ ।