जेलमुक्त भए टोपबहादुर रायमाझी

काठमाडौँ । नक्कली भुटानी शरणार्थी प्रकरणमा दोषी ठहर भई चार वर्ष कैद सजाय सुनाइएका पूर्वउपप्रधानमन्त्री टोपबहादुर रायमाझी ज्येष्ठ नागरिकको सुविधाअनुसार २५ प्रतिशत कैद छुट पाएपछि जेलमुक्त भएका छन् ।

Watch On

६५ वर्ष उमेर पूरा गरेका रायमाझी बिहीबार बिहान डिल्लीबजार कारागारबाट रिहा भएका हुन् । जिल्ला अदालत काठमाडौँको आदेश र संशोधित कैदीपुर्जीका आधारमा उनलाई रिहा गरिएको हो ।

ज्येष्ठ नागरिकसम्बन्धी ऐन, २०६३ को दफा १२ मा ६५ वर्ष उमेर पूरा भई ७० वर्ष ननाघेका ज्येष्ठ नागरिकलाई कैद सजायमा २५ प्रतिशतसम्म छुट दिन सकिने व्यवस्था छ । रायमाझीले यही कानुनी सुविधाको माग गर्दै अदालतमा निवेदन दिएका थिए ।

कात्तिक २५ गते ६५ वर्ष पूरा गरेका रायमाझीको चार वर्ष कैद सजायमा २५ प्रतिशत अर्थात् एक वर्ष छुट दिइएको हो । यसअनुसार उनले भुक्तान गर्नुपर्ने कैद अवधि तीन वर्ष कायम भएको थियो । २०८० वैशाखदेखि नै थुनामा रहेका उनले छुटपछि कायम भएको कैद अवधि पूरा गरिसकेकाले अदालतले रिहाइको आदेश दिएको हो ।

गत असार ३० गते जिल्ला अदालत काठमाडौँले रायमाझीलाई नक्कली भुटानी शरणार्थी प्रकरणमा दोषी ठहर गर्दै एकीकृत कसुरतर्फ चार वर्ष कैद र ४० हजार रुपैयाँ जरिवाना सुनाएको थियो ।

अदालतले उनलाई ठगी, संगठित अपराध र राज्यविरुद्धको कसुरमा दोषी ठहर गरेको थियो । विभिन्न कसुरमा छुट्टाछुट्टै सजाय निर्धारण भए पनि एकीकृत कसुरतर्फ अधिकतम चार वर्ष कैद कायम गरिएको थियो ।

रायमाझी २०८० वैशाखदेखि डिल्लीबजार कारागारमा थुनामा थिए ।