समाज

भीमफेदी दुर्घटनाले मर्माहत बनाएको छ : गगन थापा

सिधाकुरा

बिहीबार, कात्तिक २६, २०८३

भीमफेदी दुर्घटनाले मर्माहत बनाएको छ : गगन थापा

काठमाडौँ । नेपाली कांग्रेसका सभापति गगन थापाले मकवानपुरको भीमफेदी गाउँपालिका–६ चिसापानीगढीमा भएको यात्रुवाहक गाडी दुर्घटनाप्रति दुःख व्यक्त गरेका छन् ।

Watch On

काठमाडौँबाट छठ पर्व मनाउन सर्लाहीको सुन्दरपुरतर्फ जाँदै गरेका यात्रु सवार गाडी दुर्घटना हुँदा १० जनाको मृत्यु भएको खबरले आफूलाई स्तब्ध र मर्माहत बनाएको थापाले बताएका छन् ।

सामाजिक सञ्जालमार्फत शोक सन्देश जारी गर्दै उनले दुर्घटनामा ज्यान गुमाउनेप्रति श्रद्धाञ्जली अर्पण गरेका छन् । साथै, शोकसन्तप्त परिवारजनप्रति गहिरो समवेदना व्यक्त गर्दै यो असह्य पीडा सहन सक्ने शक्ति मिलोस् भन्ने कामना गरेका छन् ।

थापाले दुर्घटनामा घाइते भएकाहरूको शीघ्र स्वास्थ्यलाभको कामना पनि गरेका छन् ।

बिहीबार बिहान काठमाडौँबाट सर्लाहीतर्फ जाँदै गरेको यात्रुवाहक माइक्रोबस भीमफेदी–कुलेखानी–काठमाडौँ सडकखण्डअन्तर्गत चिसापानीगढीमा दुर्घटनामा परेको थियो । बिहान करिब ६ः१० बजे सडकबाट करिब ७०० मिटर तल खसेको गाडीमा सवार १० जनाको मृत्यु भएको छ भने छ जना घाइते भएका छन् ।

मृतकमध्ये दुई जनाको पहिचान खुलेको छ भने अन्यको पहिचान खुलाउने प्रक्रिया जारी रहेको प्रहरीले जनाएको छ ।

छठ पर्व मनाउन घर फर्किरहेका यात्रु दुर्घटनामा परेपछि सर्लाहीसहित विभिन्न क्षेत्रमा शोक छाएको छ ।

प्रकाशित मिति: बिहीबार, कात्तिक २६, २०८३

प्रतिक्रिया दिनुहोस्