ट्रम्प–सी–पुटिनबीच सम्भावित त्रिपक्षीय भेटबारे यस्तो छलफल

एजेन्सी । अमेरिकी विदेशमन्त्री मार्को रुबियो र चिनियाँ विदेशमन्त्री वाङ यीबीच अमेरिकी राष्ट्रपति डोनाल्ड ट्रम्प, चिनियाँ राष्ट्रपति सी चिनफिङ र रुसी राष्ट्रपति भ्लादिमिर पुटिनबीच हुन सक्ने सम्भावित त्रिपक्षीय भेटवार्ताबारे छलफल भएको छ ।

Watch On

चीनको अनुरोधमा नोभेम्बर ११ मा भएको टेलिफोन वार्तामा दुई देशबीचको सम्बन्ध र आगामी उच्चस्तरीय भ्रमणका विषयमा कुराकानी भएको अमेरिकी विदेश मन्त्रालयले जनाएको छ । वार्तामा ट्रम्पको चीन भ्रमण तथा सीको अमेरिकाको फ्लोरिडा भ्रमणबारे पनि छलफल भएको थियो ।

ट्रम्प नोभेम्बर १८–१९ मा चीनको सेन्जेनमा हुने एसिया प्रशान्त आर्थिक सहयोग (एपेक) शिखर सम्मेलनमा सहभागी हुन चीन जाने तयारीमा छन् । त्यस्तै, सी डिसेम्बर १४–१५ मा फ्लोरिडाको मियामीमा हुने जी–२० शिखर सम्मेलनमा सहभागी हुने कार्यक्रम छ ।

अमेरिकी विदेश मन्त्रालयका अनुसार दुवै पक्षले शान्ति र आणविक निःशस्त्रीकरणका लक्ष्य अघि बढाउन नेतास्तरमा अर्थपूर्ण संवाद आवश्यक रहेकोमा सहमति जनाएका छन् । यसमा रुससमेत सहभागी हुन सक्ने सम्भावित त्रिपक्षीय नेतास्तरीय बैठक पनि समेटिएको छ ।

यसअघि रुबियोले एपेक सम्मेलनका अवसरमा तीन नेताबीच भेटवार्ता गराउने तयारी भइरहेको बताएका थिए । राष्ट्रपति ट्रम्पले पनि चीनमा सी र पुटिनसँग भेट हुन सक्ने बताएका छन् । उनले आणविक निःशस्त्रीकरण र इरान युद्ध अन्त्यका विषयमा छलफल गर्न चाहेको बताएका थिए ।

रुस–युक्रेन युद्ध अन्त्यमा सहयोग पुग्ने भए युक्रेनी राष्ट्रपति भोलोदिमिर जेलेन्स्की सहभागी नभए पनि आफू सी र पुटिनसँग भेट्न तयार रहेको ट्रम्पले यसअघि नै बताएका थिए ।

चिनियाँ विदेशमन्त्री वाङले अमेरिकासँगको सम्बन्ध स्थिर राख्न सञ्चार र सहकार्य बढाउने तथा मतभेद र संवेदनशील विषयलाई उचित ढङ्गले समाधान गर्ने चीनको नीति रहेको बताएका थिए । सन् २०२६ का एपेक र जी–२० सम्मेलन सफल बनाउन दुवै देशले एकअर्कालाई सहयोग गर्नुपर्नेमा पनि उनले जोड दिएका थिए ।

अमेरिका र चीनका विदेशमन्त्रीबीचको पछिल्लो संवादलाई दुई देशबीचको सम्बन्ध स्थिर बनाउने र आगामी उच्चस्तरीय भेटघाट तथा अन्तर्राष्ट्रिय सम्मेलनको तयारीका रूपमा हेरिएको छ ।