आगामी बैठकमा विभिन्न प्रकरणमा मुछिएका मन्त्रीहरुको बर्खास्तीका बारेमा जानकारी गराउन सरकारलाई एमालेको माग

काठमाडाैँ । प्रमुख प्रतिपक्षी दल नेकपा एमालेले अब बस्ने बैठकमा विभिन्न प्रकरणमा मुछिएका मन्त्रीहरुको बर्खास्तीका बारेमा जानकारी गराउन माग गरको छ ।

Watch On

शुक्रबार बसेको प्रतिनिधिसभाको दोश्रो बैठकमा एमाले सचेतक महेश बर्तौलाले बालकुमारी घटनामा छानबिन आयोगले दोषी ठह¥याएका मन्त्री प्रकाश ज्वाला, टेरामक्स प्रकरणमा अख्तियारमा बयान दिएका मन्त्री मोहन बस्नेत र रामग्राम प्रकरणमा मुछिएका मन्त्री सुदन किरातीको वर्खास्तीका बारेमा प्रधानमन्त्रीले अर्को बैठकमा जानकारी गराउन माग गरेका हुन् । 

आफुहरुको माग प्रधानमन्त्रीसँग रहेपनि कतिपय सत्तारुढ सांसद आफै प्रधानमन्त्री जसरी बैठकमा प्रस्तुत भएको भन्दै उनले आपत्ती जनाए । उनले एमालेले महत्वपूर्ण कुरा उठाउँदा सरकारले सुनेपनि नसुनेझैँ गरेको जिकिर गरे ।

त्यस्तै कांग्रेसका प्रमुख सचेतक रमेश लेखकले संसद्मा कुनै पनि अवरोध नगरी संयमता र धैर्यताका साथ प्रस्तुत हुन प्रतिपक्षी दलहरुलाई आग्रह गरे । संसदमा हुने आरोप प्रत्यारोप र घोचपेचलाई सदनमा स्वभाविक रुपमा लिएर जानुपर्ने उनले बताए । अधिवशेनबाट धेरै विधेयक पारित गर्नुपर्ने भएकाले सबै मिलेर अगाडि बढ्नुपर्ने उनको भनाइ छ । 

बैठकमा सभामुख देवराज घिमिरेले प्रतिनिधिसभाको बैठकमा उठेका बिषयको सदनलाई जवाफ दिन सरकारलाई निर्देश गरे ।