अब ट्राफिक प्रहरीको बोली नरम, कारबाही कडा हुन्छ, जरिवाना पनि बढ्छ : गृहमन्त्री लामिछाने

काठमाडाैँ । उपप्रधान एवं गृहमन्त्री रवि लामिछानेले अब ट्राफिक प्रहरीको बोली कडा र कारबाही कडा हुने बताएका छन् । आइतबार काठमाडौँको सभागृहमा आयोजित ‘ट्राफिक सचेतना विशेष अभियान’को सुरुवात गर्दै उनले सडक दुर्घटना न्यूनिकरणका लागि नियम पालना नगर्नेलाई जरिवाना बढाउनुपर्ने बताएका हुन् । 

Watch On

त्यस्तै उनले ‘रोड टेष्ट’ बिना लाइसेन्स दिने विद्यमान व्यवस्थामा सुधार गर्नुपर्ने बताएका छन्। ट्राफिक प्रहरीलाई दिने गरिएको इन्सेन्टिभ हालका लागि बन्द भएपनि त्यसलाई पुनः निरन्तरता दिइने उनले बताए ।

चालकसँग पैसा लिएर संगठनकै बेइज्जत गर्ने कार्य नगर्न आग्रह गर्दै उनले ट्राफिक प्रहरीको वृत्ति विकासमा ध्यान दिइनेमा सरकार प्रतिबद्ध रहेको बताएका छन् । त्यस्तै उनले नेताको हात समाएर बढुवा हुने गलत अभ्यास सच्याएर बढुवालाई स्वचालित प्रणालीमा लैजाने तयारी गरेको बताए । 

त्यस्तै कार्यक्रममा बोल्दै ट्राफिक प्रहरी प्रमुख डीआईजी पोषराज पोखरेलले सभ्य सडक संस्कारको माध्यमबाट दुर्घटना न्यूनीकरण तथा सडक र ट्राफिक नियम पालनामा सचेतना अभिवृद्धिका लागि अभियान सञ्चालन गरिएको बताएका छनन् । उनले अभियानका क्रममा पैदल यात्रीलाई १ मिनेट र चालकलाई २ मिनेट समय दिइने बताएका छन् । 

त्यस्तै कार्यक्रममा काठमाडौँ महानगरपालिकाका तर्फबाट बोल्दै उपप्रमुख सुनिता डंगोलले अभियानले धेरैलाई जिम्मेवार नागरिक बनाउन मद्दत गर्नेमा विश्वास व्यक्त गरेकी छिन् । उनले ३० वर्ष अघिको सडक ऐनले वर्तमानको आवश्यकता सम्बोधन गर्न नसक्ने भएकाले संशोधन गर्नुपर्ने बताएकी छिन् । 

काठमाडौँको न्युरोड गेटबाट सुरु भएको र्‍याली काठमाडौँको सभागृह पुगेर टुगिंएको थियो । काठमाडौँ उपत्यका ट्राफिक प्रहरी कार्यालयद्वारा आयोजित अभियान एक सातासम्म सञ्चालन हुने बताइएको छ ।