काठमाडौं । नेकपा एकीकृत समाजवादीका नेता झलनाथ खनालले आफूमाथि पार्टी विभाजनको सुनियोजित हल्ला चलाइएको भन्दै असन्तुष्टी व्यक्त गरेका छन् । 

बुधबार एक विज्ञप्ति जारी गर्दै नेकता एसका सम्मनित नेता समेत रहेका खनालले आफूलाई जोडिएर चलाइएको हल्ला निराधार रहेको बताए । उपेन्द्र यादव नेतृत्वको जसपा नेपाल विभाजित भएपछि नेकपा एस पनि फुट्न लागेको बजारमा चर्चा छ । यसै बीच खनालले यस्तो स्पष्टीकरण दिएका हुन् ।

‘केहि दिन देखि हाम्रो गौरवमय पार्टी नेपाल कम्युनिष्ट पार्टी (एकीकृत समाजवादी) पनि विभाजित हुँदैछ, ६ जना सांसद लिएर झलनाथ खनालले संसदीय दल फुटाउँदै छन् भन्ने हल्ला बडो तीव्र रूपले फैलाइएको छ,’ खनालले विज्ञप्तिमा भनेका छन् ‘केहि अवाञ्छित, स्वार्थी र कम्युनिष्ट विरोधी तत्त्वहरूले सुनियोजित रूपले यस्तो प्रचार गरेका छन् । त्यसले पार्टी व्यापी रूपमा एउटा भ्रमको कुहिरो फैलाइदियो ।’

खनालले पार्टीभित्र र बाहिरका दक्षिणपन्थी र षड्यन्त्रकारी तत्त्वहरू आतङ्कित भएर यस्तो हल्ला मच्चाइएको पनि आरोप लगाएका छन् । ‘देशको समाजवादी क्रान्तिका कार्यदिशा, नीति र सिद्धान्तहरूलाई परिष्कृत र परिमार्जित गर्दैछ, क्रान्तिकारी कार्यदिशाका आधारमा पार्टी एकता र कम्युनिष्ट एकतालाई विस्तार गर्ने आधार निर्माण गर्दै देशी विदेशी प्रतिक्रियावादीहरूको भण्डाफोर गर्दै नेपाली जनतालाई समाजवादको समृद्ध भविष्यतिर अघि बढ्ने मार्ग प्रदर्शन गर्दैछ । त्यसै कारण पार्टीभित्र र बाहिरका दक्षिणपन्थी र षड्यन्त्रकारी तत्त्वहरू आतङ्कित भएका छन् । त्यसैले उनीहरू प्रतिक्रियावादीहरूका मक्किइसकेको र थोत्रिसकेका झुटा प्रचारका हतियारहरू लिएर हाम्रो पार्टीका विरुद्ध आइलाग्न कोसिस गर्दैछन् ।’

सो पार्टीका सम्मानित नेता खनालले सम्पूर्ण नेता कार्यकर्ता, समर्थक र शुभेच्छुकलाई प्रतिकृयावादीहरू, औसरवादीहरू र पार्टी विरोधी क्षुद्र तत्त्वहरूका अनर्गल प्रचारबाट होसियार बन्न आग्रह गरेका छन् ।