२८ भदौ, काठमाडौं - किर्तिपुरको नयाँबस्तीमा रहेको भ्याली इन्स्टिच्युटका संचालकले दर्जन बढी विद्यार्थीको लाखौँ रकम फिर्ता नगरी फरार भएका छन् । 

भ्याली इन्स्टिच्युटबाट पीडित हुनेमध्येकी एक हुन्, महेन्द्रनगरकी इश्वरी चौधरी । विद्यार्थी भिसामा कोरिया जाने सपना सजाएर ५ वर्षअघि काठमाडौँ आएकी उनी, चाबहिलको एक कोरिएन भाषा कक्षा संचालन हुने ठाउँमा पुगिन् । जुन भाषा कक्षा किर्तिपुरको भ्याली इन्स्टिच्युट नामक संस्थाले संचालन गरेको थियो । 

उक्त इन्स्टिच्युटले उपत्यकाका विभिन्न स्थानमा आफ्ना शाखा कार्यालय विस्तार गरेको छ । सोही अनुरुप उनी आफूलाई पायक पर्ने स्थान किर्तिपुरको नयाँ बस्तीमा रहेको कार्यालयमा पढ्न थालिन् । 

पढ्न थालेको केही समयपछि विभिन्न चरणमा उनको इन्टरभ्यु भयो । इश्वरी छनोट पनि भइन् । इन्स्टिच्युटले अफर लेटर समेत प्रिन्ट गरेर दियो । अफर लेटर नै आईसकेपछि ईश्वरी कोरिया पुग्नेमा ढुक्क थिइन् । त्यसपछि उनलाई कोरिया जाने तयारी गर्नु भन्दै इन्स्टिच्युटले घर पठायो । केही दिनपछि इन्स्टिच्युटबाट फोन आयो, र नो अब्जेक्सन लेटर (एनओसी) बनाउनुपर्छ भनियो । ईशवरीले एनओसी पनि बनाईन् । त्यसपछि उनको प्रक्रिया पूरा भएको भन्दै रकम जम्मा गर्न भनियो । रकम जम्मा गर्न उनलाई व्यक्तिगत खाताको विवरण उपलब्ध गराईयो । 

अफर लेटरको प्रिन्ट पाईसकेकी ईश्वरीले ढुक्क भएर उक्त खातामा ८ लाख रुपैयाँ जम्मा गरिन् । उनी भन्छिन्, ‘एनओसी बनाउन बोलाउनुभयो । एनओसी बनाएपछि अब पैसा हाल्नुपर्यो भनेर फोन गरेर पैसा मगाउनुभयो । पैसा हाल्नलाई कम्पनीको नभएर व्यक्तिको खाता दिनुभयो । त्यसैमा पैसा जम्मा गरेँ । व्यक्तिको खातामा पैसा हाल्न नहुने थाहा भएन।’ 

ईश्वरीलाई इन्स्टिच्युटले रुपलाल थापा नाम गरेका व्यक्तिको खाता नम्बर उपलब्ध गराएको थियो । रुपलाल थापा, हिमाल गड्तौला र गजेन्द्र तामाङ् उक्त इन्स्टिच्युटका काउन्सिलर अर्थात सल्लाहकार हुन् । ईश्वरीले सोही खातामा सम्पूर्ण पैसा जम्मा गरिन् । 

पैसा जम्मा गरेपछि कोरिया पुग्नेमा ढुक्क भएकी ईश्वरीले केही समयपछि थाहा पाइन् कि उनलाई देखाइएको आफर लेटर नक्कली रहेछ । उनको प्रोसेसिङको लागि तयार गरिएका अन्य कागजात पनि सबै नक्कली रहेछन् । उक्त समयदेखि हालसम्म उनी आफ्नो पैसा फिर्ता माग्नको लागि निरन्तर काठमाडौं धाईरहेकी छिन् । 

इश्वरीले उनीहरुको खातामा पैसा जम्मा गरेको ५ वर्षभन्दा धेरै भइसकेको छ । तर इन्स्टिच्युटका पदाधिकारीहरु कहिल्यै उनको सम्पर्कमा आउँदैनन् । बल्लतल्ल फोन उठेपनि त्यहाँका संचालकदेखि सम्पूर्ण कर्मचारीहरु जसरी पनि कोरिया पठाउने भन्दै आश्वस्थ पार्नेतिर लाग्छन् । ‘हाम्रो गाउँ त टाढा छ भन्नेबित्तिकै आउन सकिँदैन । फोन गरेर सोध्दा, हामी जसरी पनि गर्छौँ । तपाईँहरुलाई जसरी पनि कोरिया पठाउँछौँ । ढुक्क भएर बस्दा हुन्छ भन्छन् ।’

आफ्नो पैसा फिर्ता नहुने भएपछि उनले पछिल्लो समय जिल्ला प्रहरी परिसर टेकुमा इन्स्टिच्युटका पदाधिकारीविरुद्ध ठगीको उजुरी दर्ता गराइन् । त्यसपछि भने ईश्वरीले विभिन्न चरणमा एक लाख ५० हजार पैसा फिर्ता पाइन् । बाँकी पैसा अझै फिर्ता पाएकी छैनन् । 

ईश्वरीले गाउँघरमा ब्याज ऋण लिएर पैसा बुझाएकी थिइन् । उनले पाँच वर्षको ब्याज पर्दैन, सावाँ मात्र भएपनि फिर्ता गरिदिनु भन्दा अहिले त इन्स्टिच्युटका कर्मचारीले इश्वरीलाई कार्यालय प्रवेशमै रोक लगाउने गरेका छन् ।  ‘एकदिन कक्षाबाहिर भ्याली इन्स्टिच्युटको प्रमुख संचालक सुबास राइको बाइक देखेँ । भित्र गएर भेट्नुपर्यो भन्दा रिसेप्सनबाट भित्र नै छिर्न दिइएन । तलै बस, यहिँ पर्ख सरलाई डिस्टर्ब हुन्छ भनेर भेट्नै दिएनन्’ उनी भन्छिन् ।  

५ वर्ष कोरिया पनि पठाउन नसकेको र पैसा पनि फिर्ता नपाएको गुनासो लिएर ईश्वरी हाम्रो कार्यालयसम्म आइन् । त्यसपछि हाम्रो टिम रिपोर्टिङको लागि किर्तिपुरस्थित भ्याली इन्स्टिच्युटको कार्यालय पुग्यो । त्यहाँ पुग्दा उक्त इन्स्टिच्युका कर्मचारीहरुले इन्स्टिच्युका संचालकहरु कोही पनि कार्यालय नआउने बताए । 

त्यसपछि हामी सोही इन्स्टिच्युटकै अर्को भवनमा छिर्यौँ । त्यहाँ इन्स्टिच्युटका संचालक सुवास राइलाई फेला पार्यौँ । हामी पुग्नासाथ बाउन्सर वरिपरी राखेर आफ्नो शक्ती प्रदर्शन गर्न थाले । हामीले ईश्वरीको रकम फिर्ता, नक्कली अफर लेटर लगायत विषयमा गरेको प्रश्नलाई वास्तै नगरी उनी हाम्रो प्रश्न टार्ने प्रयास गर्न थाले र केहीबेरमा त्यहाँबाट भागे । 

सो क्रममा हामीले इन्स्टिच्युटबाट पीडित बनेका अन्य विद्यार्थीहरु भेट्यौँ । ति विद्यार्थीहरुको समस्या पनि ईश्वरीको भन्दा फरक थिएन । २०१९ मा उनीहरुले बुझाएको पैसाको ब्याज बढेर कहाँ पुग्यो अत्तोपत्तो छैन तर संचालकहरु भने उनीहरुको पैसा लिएर फरार बन्ने गरेको गुनासो छ । आक्लझुक्कल कसैले भेटिहाल्यो भनेपनि संचालकहरु अनेक बहना बनाएर पन्छने गरेका छन् ।