प्रधानमन्त्री कप भलिबल लिगको उपाधि हेल्प नेपालले जित्यो

काठमाडौँ । आठौं प्रधानमन्त्री कप भलिबल लिगको उपाधि टिप टप हेल्प नेपाल स्पोर्ट्स क्लबले जितेको छ ।

Watch On

शनिबार भएको फाइनल खेलमा गण्डकी प्रदेशलाई पराजित गर्दै टिप टप हेल्प नेपाल पुरुष तर्फको च्याम्पियन बनेको हो । त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा भएको फाइनलमा टिप टप हेल्प नेपालले गण्डकीलाई ३–१ को सेटमा पराजित गर्यो । खेलमा पहिलो सेट हेल्प नेपालले २२–२५ ले आफ्नो पक्षमा पार्यो । दोश्रो सेट भने गण्डकीले २५–२० ले जित्यो । त्यसपछिको तेश्रो र चौथो सेट २०–२५ र २०–२५ ले जित्दै टिप टप हेल्प नेपाल च्याम्पियन बन्यो ।

त्यस्तै प्रतियोगीताको महिलातर्फ एभरेस्ट भलिबल क्लब बुटवललाई पराजित गर्दै विभागीय नेपाल पुलिस क्लबले उपाधि कव्जा गर्यो । एभरेस्टलाई ३–२ को सेटमा पराजित गर्दै पुलिस च्याम्पियन बन्न सफल भएको हो । फाइनलको पहिलो सेट पुुलिसले २५–२१ ले जित्यो । दोस्रो सेट पनि २५–२३ ले जित्दै पुलिस उपाधितर्फ लम्कियो । तर, त्यसपछिको दुवै सेट एभरेस्टलाई २०–२५ र २०–२५ ले सुम्पदा खेल पाँचौं सेटमा लम्बियो । निर्णायक तथा पाँचौ सेट निकै रोमाञ्चक रहँदा पुलिसले १५–१२ ले बाजी मार्न सफल भयो । उपाधिसँगै बिजेताले ८ लाख रुपैयाँ, ट्रफी मेडल र प्रमाणपत्र प्राप्त गरेको छ । दोस्रो हुने टीमले चार लाख प्राप्त गरेको छ ।