बोल्दाबोल्दै रोकेपछि रामहरि खतिवडालाई रविको कटाक्ष : ‘वाह ! मर्निङ् सोज द डे’

काठमाडाैँ । उपप्रधान तथा गृहमन्त्री रवि लामिछानले नेपाली कांग्रेसका सांसद रामहरि खतिवडालाई दिउँसोको पूर्वानुमान बिहानीले गर्छ भन्दै कटाक्ष गरेका छन् । गृहमन्त्री लामिछानेले रोष्ट्रममा बोल्दै गर्दा नियमापत्ति जनाउँदै सांसद खतिवडा उठेपछि लामिछानेले ‘मर्निङ् सोज द डे’ भन्दै व्यंग्यात्मक प्रहार गरेका छन् । 

Watch On

लामिछानेले बोल्दै गर्दा बिचमै उठेर सांसद खतिवडाले भने, ‘विश्वासको मत लिने समयमा गृहमन्त्रीका हैसियतले बोलाइएको हो कि रास्वपाको नेताको हैसियतले ? यहाँको भाषण रास्वपाको नेताको हैसियतमा हो कि गृहमन्त्रीको हैसियतमा ? जानकारी पाउँ सभामुख महोदय ।’

सांसद खतिवडाको प्रश्नको जवाफ दिँदै उपसभामुख इन्दिरा रानाले रवि लामिछानेलाई ‘उपप्रधानमन्त्री तथा गृहमन्त्री र रास्वपाको नेताको हैसियतले यहाँ समय नदिइएको’ बताइन् । त्यस्तै उनले अभिव्यक्ति छोट्याउन समेत आग्रह गरेकी छिन् । 

त्यति गर्दा पनि सांसद खतिवडाले विरोध गर्न नछोडेपछि आक्रोसित भएका लामिछानेले भने, ‘सभामुख महोदय, म १ मिनेटमा आफ्नो भनाई टुङ्ग्याउँछु, त्यो एक मिनेट मलाई दिनुभयो भने म यो ठाउँ खालि गरिदिन्छु ।’

त्यति भन्दा पनि सांसद खतिवडाले हल्ला गर्न नछोडेपछि उनले भने, ‘माननीयज्यू सरकार बन्न पाएको छैन, यताबाट सुरु गर्न थालिसक्नु भयो । वाह, मर्निङ सोज द डे । तपाईँहरुको बिहानीको लागि शुभकामना ।’

त्यस्तै उनले आफूले कार्यविधिअनुरुप नै बोलेको बताए ।