सरकारविरुद्ध नियोजित र प्रयोजितरुपमा अनावश्यक हल्ला फैलाउन खोजिएको छ : प्रधानमन्त्री ओली

काठमाडाैँ । प्रधानमन्त्री केपी शर्मा ओलीले अहिले नियोजित र प्रयोजितरुपमा सरकारबिरुद्ध अनावश्यक हल्ला फैलाउन खोजिएको बताएका छन् । 

Watch On

निजामती सेवा दिवसका अवसरमा शनिबार सिंहदरबारमा आयोजित मूल समारोहलाई सम्बोधन गर्दै प्रधानमन्त्री ओलीले सरकारको बिरोध गरेर बहादुरी देखाउन खोज्नेले नियोजित र प्रयोजितरुपमा अनावश्यक हल्ला फैलाउन खोजेको बताएका हुन् । उनले अधिकार छ भन्दैमा दुुई चार जना गएर तालाबन्दी गर्ने, सेवा प्रभावित पार्ने, अत्यावश्यक क्षेत्रमा हड्ताल गर्ने जस्ता काम उचित नहुने बताए । प्रधानमन्त्री ओलीले केहि बर्ष नेपालमा हिंसा भएको भन्दै केहि मान्छेहरुले त्यसको महिमामण्डन गरेको टिप्पणी गरे । उनले ठूला दुई दल मिलेर बनेको अहिलेको सरकारलाई सहज रुपमा काम गर्न कुनै कठिनाई नभएको बताए । मुलुकमा परिवर्तनका लागि नायकत्व लिएका पार्टीहरुको सुविधाजनक बहुमतको सरकार भएकाले यसले निजामती सेवा विधेयकलगायत महत्वपूर्ण विधेयकलाई छिटो पारितका लागि छलफल अघि बढाउने विश्वास दिलाए ।

भ्रष्टाचार गर्नु भनेको देशभरका जनताको एकैपटक पकेट मारे सरह हुने भएकाले त्यस्तो दुुष्कर्ममा सम्लग्न नहुन उनले कर्मचारीलाई निर्देशन समेत दिए ।

उनले विगतमा कर्मचारीको उत्साह थप्नका लागि आफूूले एकै पटक २५ प्रतिशत तलब वृद्धि गरे पनि हाल मुलुकको आर्थिक अवस्था कमजोर भएकाले तलब बृद्धि गर्न सक्ने अवस्थामा नरहेको बताए ।

राज्यबाट जनतालाई दिइने सेवामा कुनै कारणले विलम्ब र आलटान नगर्न निर्देश गर्दै प्रधानमन्त्री ओलीले जनतालाई दुःख नदिइ सकारात्मक अनुभूति दिएर नागरिकलाई देशभित्र बस्न लायक बनाउनु सबैको दायित्व भएको बताए । 

 कार्यक्रममा उत्कृष्ट कार्यसम्पादन गर्ने निजामती कर्मचारीहरुलाई सम्मान तथा पुरस्कृत गरिएको थियो ।