काठमाडौँ । एप्पल कम्पनीले आईफोन शृंखलाको १६औँ संस्करण सोमबार सार्वजनिक गरेको छ । सोमबार भएको ‘एप्पल इभेन्ट’मा एप्पलका प्रमुख कार्यकारी टिम कुकले अत्याधुनिक डिजाइन र फिचरसहितको आईफोन १६ अनावरण गर्दै रोमाञ्चक नवयुवगको सुरुवात भएको दाबी गरे । 

कम्पनीका अनुसार नयाँ आईफोनमा एआई प्रविधिकको भरपुर प्रयोग भएको छ । 

१६औँ संस्करणका नयाँ आईफोन सेतो, कालो, टिल (गाढा नीलो–हरियो), एक्वामरिन (हरियो–नीलोबाट नीलो हरियो) र गुलाबी स्वरुपमा आएको छ। नयाँ आईफोन ६.१ इन्च (आईफोन १६० र ६.७ इन्च (आईफोन १६ प्लस) दुई आकारमा उपलब्ध हुने कम्पनीले जनाएको छ । 

नयाँ फिचरः एक्सन बटन

आईफोन १६ मा एक्सन बटन राखिएको जसले यस अघि भएकको म्युट बटनलाई प्रतिस्थापन गर्दै प्रयोगकर्ताको सेटिगं कमान्ड अनुसार  प्रोग्रामिङको सुविधा दिने छ । अब फ्लासलाइट बाल्ने देखि क्यालेन्डर सम्म खोल्न एक्सन बटन प्रयोग हुने  छ । यस्तै यो आइफोनमा फिजिकल बटन पनि राखिएको जसले क्यामेरा खोल्न सहजता ल्याउने छ । 

आईफोन १६ एप्पल बौद्धिकतालाई सहयोग गर्न १७ प्रतिशत बढी सिस्टम मेमोरी ब्यान्डविथसहित आएको दाबि गरिएको छ । आइफोन १६ मा सेरामिक ग्लास स्कृन राखिएको छ, जुन यस अघिका मोडलमा भन्दा ५० प्रतिशत बढी बलियो रहेको कम्पनीको दाबी छ । 

एआइ जडित क्यामेराः सामानको विवरण पत्ता लगाउन सहयोग गर्ने 

आईफोन १६ मा प्रयोग भएको क्यामेराले कुनै वस्तु देखाएकै भरमा त्यसको विवरण प्रयोगकर्तालाई दिने छ । यसले प्रयोगकर्तालाई ‘भिजुअल इन्टेलिजेन्स’मा पहुँच दिने छ । अर्थाात अब कुनै तरकारी होस् वा रेस्टुराँतिर क्यामेरा सोझ्याउँदा त्यसबारेका रिभ्युहरु, मेनु र कसरी रिजर्भ गर्ने सबै कुराको जानकारी  आइफोन १६ ले दिने छ । 

नवीनतम एआई फिचर: एप्पल बौद्धिकता

नयाँ आईफोनमा राखिएको एआई फिचरलाई कम्पनीले एप्पल बौद्धिकता अर्थात् एप्पल इन्टेलिजेन्स भनेको छ। अब सिरिसँगको कुराकानी धेरै स्वाभाविक जस्तो हुने कम्पनीको दाबी छ । 

अब सिरिले प्रयोगकर्ताको लिखित मेसेजबाट पनि प्रतिक्रिया दिन्छ अर्थात् आफ्ना साथीले सुझाएका गीत सुन्न र टिभी शोहरु सिरिले सम्झाउने सुविधा दिएको छ । जस्तो कि प्रयोगकर्ताले केही दिनअघिको कुनै पार्टी वा वनभोज कार्यक्रमको फोटो कसैलाई पठाऊ भन्दा सिरिले त्यो सबै खोजेर पठाउने छ । साथै आफूअनुकूलको एआईचित्रित इमोजी तथा फोटो खोज्न एप्पल इन्टेलिजेन्स प्रभावकारी हुने छ । 

सुरुवाती मूल्य ७९९ अमेरिकी डलर 

नयाँ आईफोन १६ को मूल्य ७९९ अमेरिकी डलरबाट सुरु हुन्छ। त्यस्तै आईफोन १६ प्लसको सुरुवाती मूल्य ८९९ अमेरिकी डलरबाट सुरु हुन्छ। 

एप्पलले पछिल्लो भर्सनको उच्चतम आईफोन प्रो ल्याएको छ। यो एप्पल इन्टेलिजेन्सका लागि नै डिजाइन गरिएको छ। गत वर्षको मोडलहरुभन्दा ०।२ इन्च ठूलो आकारमा आईफोन १६ प्रो लाइन आएको छ। इन्ट्रि लेभलको प्रो ६.३ इन्च र प्रो म्याक्स ६.९ इन्चको छ । ठूलो डिस्प्ले, पातलो बोर्डर, लामो समय टिक्ने ब्याट्रीका साथ नयाँ फोन अनावरण भएको छ। यसमा एप्पलकै ए१८ चिप एप्पलको नयाँ एआई टुल्सलाई सहयोग गर्ने गरी डिजाइन गरिएको छ। 

नयाँ फोनबाट प्रयोगकर्ताले एक सेकेन्डमा १२० फ्रेम फोरके रिजोलुसनमा शुट गर्न सक्छन्। एउटा क्लिप रेकर्ड गरिसकेपछि भिडिओलाई स्लोमोसनमा रुपान्तरण समेत गर्न सकिन्छ। छुट्टै सेटिङ मिलाइरहनुपर्दैन। यसमा अनावश्यक ध्वनि काटेर अडिओ रेकर्डिङको सुविधा छ। 

यसको सुरुवाती मुल्य  ९९९ अमेरिकी डलरबाट रहेको छ ।  आईफोन १६ प्रो म्याक्स भने १ हजार १९९ अमेरिकी डलरबाट सुरु हुने सोमबार कम्पनीले जनाएको छ।  यी रहर लाग्दा आइफोन बजारमा आउन भने केहि समय लाग्ने छ । कम्पनीले आगामी शुक्रबारबाट मात्रै दुवै मोडलको अग्रिम बुकिङ खुल्ला गर्ने जनाएको छ।