सबै कुरा

नयाँ पार्टीहरूलाई तर्साउन खोजिएको छ, प्रतिरोध गरौँ : सुमना श्रेष्ठ

सिधाकुरा

मंगलबार, कात्तिक १३, २०८१

नयाँ पार्टीहरूलाई तर्साउन खोजिएको छ, प्रतिरोध गरौँ : सुमना श्रेष्ठ

काठमाडाैँ । राष्ट्रिय स्वतन्त्र पार्टीकी केन्द्रीय सदस्य एवं प्रतिनिधि सभा सदस्य सुमना श्रेष्ठले वर्तमान सत्ताले नयाँ सोच र नयाँ पार्टीलाई हेपेको बताएकी छिन्। रास्वपाले मङ्गलवार बालुवाटारमा आयोजना गरेको प्रतिरोध सभामा बोल्दै उनले दुई पुराना दलको सरकारले नयाँ दलहरूलाई थर्काउन, तर्साउन र फुटाउन खोजेको आरोप लगाइन्।

Watch On

‘नेपालीहरू निसास्सिएका छौँ। रास्वपा त जनताको प्रतिरोधमै जन्मिएको पार्टी हो। प्रतिरोधलाई गलाउन खोजिँदैछ। थकाउन र तर्साउन खोजिँदैछ। फुटाउन खोजिदैँछ। यसको प्रतिकार गर्न हामीमा आत्मविश्वास हुनुपर्छ।,’ श्रेष्ठले भनिन्। उनले कसैलाई काखा कसैलाई पाखा नहोस् भनेर खबरदारी गर्न आयोजना भएको शान्तिपूर्ण खबरदारी सभामा राज्यले बल प्रयोग गरेकोमा विरोध गरिन्। अब ढोँगी चरित्र चल्दैन। हामीले यो दलदलबाट देशलाई निकालेरै छोड्छौँ।’ उनले भनिन्, ‘नयाँ सोचलाई हेप्ने प्रवृत्ति देखिएको छ। यसको प्रतिकार गरौँ।’

पूर्व शिक्षा, विज्ञान तथा प्रविधि मन्त्री समेत रहेकी रास्वपा नेतृ श्रेष्ठले सहकारी पीडितलाई न्याय भनेको बचत फिर्ता भएको बताइन्। सहकारीसम्बन्धी संसदीय समितिको प्रतिवेदनमा सिफारिस गरिएका संस्थागत सुधारतर्फ ध्यान दिए सहकारीका बचतकर्ताको बचत फिर्ता गराउन उनले माग गरिन्।