नेपालगञ्ज कसरी होला शान्त ? के भन्छन् अगुवाहरू ?

बाँके : सामाजिक सञ्जालको एउटा स्टाटसलाई लिएर सुरु भएको विवादका कारण नेपालगञ्जमा स्थानीय प्रशासनले मङ्गलबारदेखि कर्फ्यु लगाएको छ ।

पहिलो दिनको तुलनामा शुक्रवार नेपालगञ्ज शान्त भयो । सुरक्षा अधिकारीहरूले हिंसा र तोडफोडका घटना हुन नदिन सबै प्रयास गरिरहेको जनाएको छ ।

गत आइतबार मुस्लिम समुदायले आफ्नो धार्मिक आस्थामा चोट पुर्याउने गरी कुनै व्यक्तिले सामाजिक सञ्जालमा स्टाटस लेखेको भन्दै विरोध जनाएको थियो । विरोधपछि ती युवाले स्टाटस हटाउँदै माफीसमेत मागेका थिए ।

तर मुस्लिम समुदायले विरोध जनाउने क्रममा हिन्दु समुदायलाई लक्षित गरी गालीगलौज गरेपछि मंगलबार ओमकार समुदायको अगुवाइमा र्याली भएको थियो । र्यालीमाथि ढुंगा प्रहार भएपछि धार्मिक सद्भाव भड्किएको हो ।

हिन्दु समुदायले आइतबार भएको मुस्लिम समुदायको प्रदर्शनको जवाफ दिन मंगलबार र्याली कालेको थियो । हल्लैहल्लाको पछि लागेर विरोधमा उत्रिँदा दुई सम्प्रदायबीचको सद्भाव दूरी बढ्न गएको देखिन्छ ।

यही विषयमा सोमबार मात्रै जिल्ला प्रशासन कार्यालय बाँकेमा सर्वपक्षीय र सर्वदलीय बैठक बसेर सामाजिक सद्भाव र भाइचारा कायम गर्नुका साथै मंगलबार बिहान नेपालगन्जमा सद्भाव र्याली निकालिएको थियो ।

इन्सेक लुम्बिनी प्रदेश संयोजक भोला महतले भने ‘विगतमा हाम्रा अघि जे जस्ता घटनाहरू घटे, मानवीय क्षति समेत हामीले देखेका छौँ ।अहिले पनि उस्तै प्रकृतिका द्वन्द्व निम्ताउने कामहरू भइरहेका छन् , सम्पुर्ण नेपालगञ्ज बासीलाई सामाजिक सदभाव कायम गर्न र भाइ चाराको सम्‍बन्ध कायम गर्नुपर्छ’।

नेपालगञ्ज उपमहानगरपालिकाका उपप्रमुख करुद्रिन राईले जे नहुन पर्ने घटना भैसकेकाले यसको समाधानका लागि नेपालगञ्जवासी संयमित हुनु पर्ने बताउँछन् । उपप्रमुख राईले भने हामी एक आपसमा मिलेर बस्दाको शहर र एकआपसमा लडेर बस्दाको शहर धेरै फरक हुने रहेछ, दुबै समुदायले एकअर्कालाई सम्मान गरि सद्भाव बाँड्नुको विकल्प छैन ।

राईले थपे, धार्मिक विवादले दुबै पक्षलाई फाइद नगर्ने भएकाले सबैले सामाजिक सञ्जालमा संयमित भएर प्रस्तुत हुनु पर्छ । उपप्रमुख राईले भने नेपालगञ्जमा धेरै वर्ष देखि मिलेर बस्दै आएका नेपाली दाजुभाइ दिदिबहिनी, हिन्दु मुस्लिम सबै एक आपसमा मिलेर बस्न चाहन्छन् र यसको लागि एक आपसमा मिलेर बस्नु बाहेक अरु कुनै उपाय छैन ।

नेपालगञ्जका अब्दुल वाहिद मन्सुरी इस्लाम धर्ममा आस्था राख्छन् । तर, उनी हरेक वर्ष हिन्दु धर्मावलम्बीका महान् चाडपर्व दसैँ र तिहार धुमधामका साथ मनाउँछन् । नेपालगञ्ज धम्बोझी निवासी पुनम सिंहसँग उनले भाइटीका लगाउन थालेको २० वर्ष बितिसकेको छ ।

दसैँतिहारमा पनि उनी टीका थाप्न हिन्दु धर्मका आफन्त र इष्टमित्रकहाँ पुग्छन् । ‘बहिनीसँग मैले हरेक वर्ष भाइटीका लगाउँछु, हाम्रो पारिवारिक सम्बन्ध राम्रो छ,’ नेपाल उद्योग वाणिज्य महासङ्घका केन्द्रीय सदस्यसमेत रहेका मन्सुरीले भने,  ‘दसैँमा पनि आफन्त र इष्टमित्रकहाँ पुगेर टीका थाप्ने र आशीर्वाद लिने गर्छु ।’ ‘दसैँतिहारमा टीका थाप्न म उहाँहरूको घरमा जान्छु, इदमाचाहिँ मेरो घरमा आउनुहुन्छ,’ मन्सुरीले भने । आफूहरूबीच जोडिएको नाता र सम्बन्ध निकै प्रगाढ भएको मन्सुरीले बताए । ‘यस पटकको दशैँमा त मैले अछामसम्म पुग्ने सोच बनाएको छु, त्यहाँ पनि मेरा आफन्त र इष्टमित्र हुनुहुन्छ, इस्लाम धर्ममा मेरो आस्था रहे पनि हिन्दुहरूको चाडपर्वलाई उत्तिकै सम्मान र मन पराउँछु,’ उनले भने ।