पोखरा । रास्वपा सभापति रवि लामिछानेबारे कास्की जिल्ला प्रहरीले अनुसन्धानमा खटिएका प्रहरी अधिकृतलाई स्रोतको रुपमा उद्यृत गर्दै सार्वजनिक भएका समाचारहरुमा गम्भीर ध्यानाकर्षण भएको बताएको छ । जिल्ला प्रहरी कार्यालयले अपराध अनुसन्धान तथा कारबाही जस्तो विषयमा संवेदनशिल भई सूचना सम्प्रेषण गर्न पनि आग्रह गरेको छ । बुुधबार एक विज्ञप्ती जारी गर्दै जिल्ला प्रहरी कार्यालयले यस्तो बताएको हो । 

‘विज्ञप्तीमा भनिएको छ, सूचनाको हकसम्बन्धी ऐन, २०६४ मा व्यवस्था भए बमोजिम अपराध अनुसन्धान, तहकिकात तथा अभियोजनमा प्रत्यक्ष असर पार्ने सूचना प्रवाह गरिने छैन भन्ने प्रावधान अन्तर्गत गोपनियता कायम राख्नुपर्ने विषयहरुमा समेत केही सञ्चार माध्यममा अनुसान्धानको क्रममा रहेका विषयबस्तुहरुमा समाचार बनाउनको लागि यस जिल्ला प्रहरी कार्यालय, कास्कीले कुनै पनि आधिकारिक र औपचारिक स्रोत बिना नै यस कार्यालय र अनुसन्धानमा खटिएका अधिकृत भनी स्रोतको रुपमा उद्यृत गर्दै गरिएको समाचार सम्प्रेषणप्रति कार्यालयको ध्यानाकर्षण भएको छ ।’

कात्तिक २ गतेदेखि रास्वपा सभापति रवि लामिछाने कास्की प्रहरीको हिरासतमा छन् । त्यसपछि कास्की प्रहरीलाई स्रोत उल्लेख गर्दै बिभिन्न सञ्चारमाध्यममा बिभिन्न समचार आएपछि कास्की प्रहरीले यस्तो विज्ञप्ती निकालेको बुझिएको छ ।