फ्रान्सस्थित नेपाली दुतावासले नविकरण भएका राहदानी नदिँदा पोर्चुगलका हजारौँ नेपाली समस्यामा

फ्रान्सस्थित नेपाली राजदूतावासले नवीकरण गरिएका हजारौँ पासपोर्ट वितरण नगरिदिँदा पोर्चुगलमा रहेका नेपाली समस्यामा परेका छन् । 

फ्रान्सस्थित नेपाली राजदूतावासले गत अगस्ट २ देखि १३ सम्म पोर्चुगलको राजधानी लिस्बनमा गएर घुम्ती शिविर सञ्चालन गर्यो । वर्षौँदेखि म्याद गुज्रिएका र हराएका पासपोर्टहरू नवीकरण गर्नका लागि सञ्चालन गरिएको सो घुम्तीमार्फत ४ हजार बढी नेपालीले सेवा लिए । उनीहरूले आफ्नो राहदानी नवीकरण गर्न दुतावासको जिम्मा लगाए । 

लामो समयदेखि पोर्चुगलमा रहेका रेशम लाल ढकालले सोही शिविरमा गएर आफ्नो राहदानी नवीकरण गर्न दुतावासको जिम्मा लगाए । पोर्चुगलमा नेपाल सरकारका कुनै पनि वैधानिक निकाय नभएका कारण तनावमा रहेका रेशमलगायत अन्य नेपालीलाई सहज बनाइदिएको थियो । 

पासपोर्ट जिम्मा लिएर गएको दुतावासले करिब २ महिनापछि अर्थात अक्टोबर ३० तारिखका दिन घुम्ती शिविरबाट सङ्कलन  गरिएका पासपोर्ट नवीकरण भयो भन्ने सूचना जारी गर्यो । 

त्यस्तै, नवीकरण भएर दुतावासमा जम्मा भएका पासपोर्टको नामावली समेत सार्वजनिक गर्यो । जहाँ रेशम लाल ढकालको समेत नाम छ । तर, नवीकरण भएर दुतावासमा रहेको आफ्नो राहदानी उनले एक महिना बित्दासमेत पाएका छैनन् ।

पासपोर्ट नवीकरण भयो भनेर दुतावासले सार्वजनिक गरेको सूचनामा आफूलाई पायक पर्ने ठेगानामा कुरियरमार्फत राहदानी लिन सक्ने जनाइएको थियो । सोहीबमोजिम ढकालले कुरिअर बुक समेत गरे । तर, एक महिना बित्यो अझै राहदानी पाएनन् । 

लामो समयदेखि राहदानीवीहिन भएपछि यतिबेला उनलाई पोर्चुगलमा काम गर्न समस्या पर्न थालेको छ । अझ यतिबेला लामो समयपछि पोर्चुगलले अस्थाई निवास कार्ड वितरण गर्नका लागि आवेदन खुलाएको छ । सोहीबमोजिम फर्म भरेका उनको बायोमेट्रिक गर्ने मिति नजिकिँदै छ । तर, आफूसँग राहदानी नभएपछि आफूले सो अवसर गुमाउने अवस्थामा पुगेको उनी बताउँछन् ।

सरकारी निकायको हेलचेक्रयाईंका कारण आफूहरूले लामो समयपछि पाउन लागेको सुविधासमेत गुमाउनुपर्ने अवस्था बनेको उनी बताउँछन् । 

रेशमले झैँ पोर्चुगलमै कार्यरत रमेश पुन मगरले पनि राहदानी वितरण गर्न दुतावासको जिम्मा लगाएका थिए । उनको समेत राहदानी नवीकरण भएको भन्दै नामावली सार्वजनिक भयो । सोही अनुरूप उनले टीआरसी अर्थात अस्थायी निवास पत्रका लागि माग फारम भरे । नोभेम्बर २९ तारिखमा उनको बायोमेट्रिक गर्नुपर्ने थियो तर दुतावासले राहदानी पठाएन । जसले गर्दा उनले पोर्चुगल सरकारबाट पाउने सो सुविधा नपाउने निश्चित भएको छ । 

अस्थायी निवास पत्रमात्र हैन राहदानी नहुँदा उनलाई पोर्चुगलमा काम गर्न समेत मुस्किल पर्न थालेको छ । आफूहरुको राहदानी नभएपछि समस्या परेको तर दुतावासलाई सम्पर्क गर्दा रेस्पोन्स नआउने गरेको उनको दुखेसो छ । 

रेशम र रमेश मात्र हैन, फ्रान्सस्थित नेपाली दुतावासको लापरबाहीले अहिले हकजारौँ नेपाली समस्यामा छन् । विगतमा पोर्चुगलमा रहेको कन्सुलर सेवा बन्द गरिएपछि फ्रान्सको दुतावासले राहदानी नवीकरण गर्न भन्दै राहदानी लगेको तर नवीकरण गरेर फिर्ता नदिएको भन्दै नेपालीहरु आक्रोशित छन् । 

आफूहरूले दुतावासमा सम्पर्क गर्दा हतपत रेस्पोन्स नगर्ने, गरेपनि बजेट छैन, कर्मचारी अभाव छ भन्ने गैरजिम्मेवार जवाफ पाउने गरेको उनीहरु बताउँछन् । बजेट नभए बरु आफूहरु पैसा उठाएर दिने तर आफूहरुको पासपोर्ट जिम्मा लगाइदिन उनीहरुको अनुरोध छ । 

तर, फ्रान्सस्थित नेपाली दूतावास भने जनशक्ति अभावलाई देखाएर पन्छिन्छ । अहिले फ्रान्सका लागि नेपाली राजदूत सुधिर भट्टराई छन् । उनको कामलाई लिएर नेपालीहरु असन्तुष्ट छन् । झण्डै ४ हजार नेपालीहरु राहदानी नपाएर हैरानी खेपिरहँदा दूतावासको भने फोन समेत उठ्दैन । राहदानी रोक्ने कुनै उद्येश्य नभए पनि पठाउन समस्या भएको दूतावासका प्रथम सेक्रेटरी दिपेन्द्र साहले बताए । 

‘राहदानी बनेको छ तर पठाउन सकिएको छैन,’ शाहले भने,‘दूतावासमा काम गर्ने कर्मचारी देखि बजेट लगायतका समस्या झेलिरहेका छौँ ।’ उनले सरकारी निकायबीच समन्वय गरेर पासपोर्ट वितरण गर्ने दाबी पनि गरे ।