नागरिक उड्डयनसम्बन्धी ऐन बनाउन खोज्दा कोहि पनि संशकित हुन पर्दैन : पर्यटनमन्त्री बद्रीप्रसाद पाण्डे

काठमाडाैँ । संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले नागरिक उड्डयनसम्बन्धी ऐन बनाउन खोज्दा कोहि पनि संशकित हुन नपर्ने बताएका छन् । 

नेपाल नागरिक उड्डयन प्राधिकरणको २६ औँ वार्षिकोत्सवको अवसरमा मंगलबार काठमाडौँमा आयोजित कार्यक्रममा मन्त्री पाण्डेले नागरिक उड्डयन क्षेत्रलाई व्यवस्थितका साथै नेपालको हवाई क्षेत्रलाई विश्वसनिय बनाउन आवश्यक ऐन–कानून बनाउन लागेको भन्दै कोहि पनि संशकित हुनुनपर्ने बताएका हुन् । ऐन अनुसार बनेका निकायहरुलाई आत्मनिर्भर भएर त्यस क्षेत्रमा सवल बनाउनका लागि मन्त्रालय प्रतिवद्ध रहेको उनले बताए । मन्त्री पाण्डेले बिमानस्थलका बिषयमा आएका सुझाव, गुनासो लगाएत सम्बोधन गर्ने काम प्राधिकरणको रहेको भन्दै सवै अभिभारा पुरा गर्नका लागि सक्षम हुनुपर्ने धारणा राखे ।

बिकट स्थानमा नियमित उडानका लागि निगमको विमान प्रयाप्त नरहेकाले त्यस बिषयमा पनि मन्त्रालयले आवश्यक योजना बनाइरहेको उनको भनाइ छ । उनले अन्तराष्ट्रिय वायुसेवा कम्पनीहरुसँगको सहकार्य, नियमन र नेपालको कानून अनुसार चल्ने वातावरण बनाउने कोशिस भइरहेको धारणा राखे । 

त्यस्तै प्राधिकरणका महानिर्देशक इन्जिनियर प्रदीप अधिकारीले हवाई उडानको अधिकार प्राधिकरणलाई मात्रै रहेकाले स्थानीय तह, राष्ट्रिय निकुञ्जले उडान र अवतरणमा समस्या सिर्जना गर्न खोजेको गुनासो गरे । उनले प्राधिकरणले केहि राम्रो गर्न खोजेको भन्दै राम्रो कामको सवैले साथ दिनुपर्ने बताए । अधिकारीले काठमाडौँको त्रिभुवन बिमानस्थलको क्षमता बढाउनका लागि विस्तारको काम भइरहेको जानकारी दिए । 

त्यस्तै वार्षिक प्रगति विवरण प्रस्तुत गर्दै उनले सन् २०२४ को नोभेम्बरसम्म देशका विभिन्न बिमानस्थलमार्फत ४४ लाख ४९ हजार भन्दा बढिले अन्तराष्ट्रिय यात्रा गरेको बताए । त्यस्तै आन्तरिक उडानतर्फ सन् २०२४ को नोभेम्बरसम्म ८७ लाख ६० हजारले यात्रा गरेका छन् । गत बर्षको तुलनामा यस बर्ष हवाइ यात्रा गर्नेको संख्यामा वृद्धि भएको प्राधिकरणले जनाएको छ ।